Jowai: Ka seiñ ki wakreh sorkar wada chongngiah watip kam ka Meghalaya Pensioner Association (MPA), Jowai Branch, hanlada da man ki kiwa da chongngiah ki nei kreh kaam chakri sorkar, dang pteiñ ki yei kaam chakri paidbah ha ki rukom waphær waphær.
Kamtæ ynne ka sngi won chi wynta u pynchlur ya kiwi won ki khynroo khyllood wa dang puræ da chim ki ka laad wow pynkup burom ya u Luigi Dalian Paswet u Topper ka ri-loom Jaiñtia haka Result SSLC wa dang dep pynbna daka MBOSE uwa da yoh haka kyrdan wa le yong ka thup Top-20.
Yei pynkup burom da pynman ha Q.C. Springside English Secondary School, Jowai, ka skur wa puræ hi u Luigi Dalian Paswet, hei sakhilang kiwa sikai ki khynnah skur wa kiwa ha yung ha sem yong oo.
Kamtæ neiliang ka kynhun Meghalaya Pensioner Association Jowai Branch, da e kti ko ha oo yaka song poisa wa T. 5000 deilang wa ka Certificate, wei heijooh i por da pyntip haroh ki wa ha ki snem wow wan daw nang pynheh yaka song poisa.
“I jop hi wym chong du hei bor samen yong uwon uwon u bru, kamtæ i jop yong nga leh toh lyngba i yarap u Blai wa kynthup nadoh kiwa sikai, ka bei wa u kpa,” da ong u Luigi Dalian Paswet.
Kamtæ da e khublei u ya waroh kiwa embynta hei yatoh weini i jop yong oo, neibhah khlem em ki ym ye u wow poi chaka thong.
Da kyntu haroh u ya ki para khynnah skur wow man ki wa kreh chitom wei wow chaniah pyn haki hi natlor wow em bait i mynsien yakhun yow poi chakhmat heiwon iwon i kaam wa leh ki.
Yaka yalang pynkup burom da pynlai da u L. Shylla President MPA, wei da yoh i klam na u T.W. Blah Secretary MPA, na u K. Tariang, i rwai naki khynnah puræ Class X, katwa yei ktien e khublei da yoh na u S. Tariang.
Discussion about this post