Shillong: U MLA ka BJP na South Shillong, u Sanbor Shullai ynne ka sngi da yachem u wa u Executive Member (EM) wa pait yaka chnat Trade ka Khasi Hills Autonomous District Council (KHADC), u Paul Lyndoh neidaw wa kam u wa chah pyndik ki baar jylla hei pyrtuid ka Trading Licence.
Katkam wa ong u Sanbor, ki baar jylla kiwa khayi pateiñ da chah pyndik deiwa chah khynra Trading Licence ha ki bru wa ym tipmit da ka aiñ.
Ha ka dorkhat wa da e u cha u Paul, u Sanbor da e buit u wa ya i sylli ya ki Trading Licence toh u leh da ki bru wa da tipmit da ka aiñ hei emlang ki dkhot ka Dorbar Chnong.
Chooh chooh u MLA ka BJP da ong u wa hawa pynthymme yaka Licence da paan boon jait ki kot ki sla kam ka House Owner Certificate, NOC na u Syiem ka Mylliem, ka Rangbah Chnong Certificate waka Residential Certificate.
Da ong u leh wa katkam ki kyndon ka aiñ Section 3 A (2) ka Khasi Hills District (Trading By Non-Tribal’s) Regulation, 1954, da klam che ko wa ya kiwa da em Licence chwa, u chah u pynthymme ki lada ym em ka ujor pyrchah ya ki wei ini i leh katni man ko kamwa yaleh Licence thymme ym toh de kamwa da jooh leh nachwa.
Da kdaw u leh wa ym em bood yei por wow pynthymme ya ki Trading Licence iwa da e por 10 sngi heiwa ka Receipt wa yoh toh kawa im 10 sngi tangwa ym pynthymme yaka Licence hapoh 10 sngi iwa man pyrchah yaka aiñ wa da chna da ka KHADC hi.
Da ong u leh wa i pynku dor yaka bai Licence toh u man ko katkam ka aiñ kamjooh ka Sixth Schedule, wei i pynku syndet da ktah ko heiwa daw ku dor ki mar ki mata wei emkaam leh wow pykhat ya kiwa dooh wa duk.
Discussion about this post