Khliehriat: Ka Swachh Sundar Shauchalaya Day da kynmoo ya ka ha East Jaiñtia Hills District ha ka yalang wa pynman da ka yung krehkaam ka District Swachh Bharat Mission (Grameen) East Jaiñtia Hills, heiwa u Additional Deputy Commissioner u S.S. Syiemlieh da wan u kam u kongsan ha ka 16 tarik uni u bnai.
Ya ka yalang da pynlai da u Wanbhalang Buam uwa man kam u District Coordinator ka District Swachh Bharat Mission (G).
U kongsan hei klam yong oo da yaroh u ya ki dkhot ka DSBM(G), ki waheh chnong kamjooh ya kiwa chong chnong ya ki kaam wa da leh ki yow pynman ya ka Swachh Sundar Shauchalaya Campaign kawa jop hapoh ka District. Da pynkynmoo u wa ym toh u kut du ha i chna ya ki paikhana wei emkaam leh wow pyntikna wa man ki kiwa khooid. Da ong u leh wa yow pynneh yei naam Open Defecation Free (ODF) ka District, emkaam wow chna ya kiwa boon ki paikhana paidbah harood ki sarokbah yow lait kiwa yah kari kamjooh kiwa lai luti u lai paikhana cha rood sarok.
U Sub-Divisional Officer PHE(RWS) uwa man leh u Member Secretary DSBM (G) u M. Passah da pynkynmoo yei emkaam u man kiwa lehkhooid wei da kyntu u leh ya ki waheh chnong wa yaka Village Water Sanitation Committees wow pteiñ ki wow pynkrehkaam ya ka Swachh Bharat Mission(Grameen).
Ha kani ka sngi, ka yung krehakaam ka District Swachh Bharat Mission (Grameen) da pynkup burom ki leh ya ki 10 tylli ki man yung yei lehbha ki ha ka yakob dro dur hapoh ka Swachh Sundar Sauchalaya Contest wa ya 5 ngut ki waheh chnong kiwa da krehchitom neibynta kani ka kaam kawa da sdang nadooh u Duiatra (January) 2019, wei ya ki khusnam da saam da u Additional Deputy Commissioner cha ki wa jop.
Ka Swachh Sundar Shauchalaya Contest (Clean Beautiful Toilet Contest) toh kawa da sdang da ka Ministry of Drinking Water and Sanitation (MoDW&S) deiwa thmu wow pynchlur yei pynemkaam paikhana cha ki chnong nongkyndong kamjooh yow pynmait dur ya ki paikhana yong ki deiwa dro da ki dur ki dar.
Ha East Jaiñtia Hills District ya kani ka Campaign da sdang da ka District Swachh Bharat Mission (SBM) hapoh i yahkhmat u F.M. Dopth, IAS Deputy Commissioner East Jaintia Hills wa ka R. Kynjing kawa jooh man kam ka Member Secretary ka DSBM(G). Hapoh chibnai ka yung krehkaam SBM waka PHE ka East Jaiñtia Hills District da niaam rong ki wei da dro dur ki ya 8999 tylli ki paikhana ha ki 139 tylli ki chnong heiwa 5 tylli na ki da chah tyrwa ki neibynta ka State Bharat Swachh Mission.
Discussion about this post