U yahkhmat chipor u Bindo ya ka UDP hadooh wa pynman yaka ka General Council

Shillong: Ka yalang wa kyrpang yong ka Central Executive Committee (CEC) ka United Democratic Party (UDP) da rai ko wow ekti ha ka Parliamentary Party (PP) wow jied ya u wow mih ha ka kaam Lamphang yong ka yung dorbar Meghalaya Legislative Assembly hadien wa khlaad noh u Dr. Donkupar Roy uwa man leh u President ka Party.

“Heiyatoh wa i jied ya u Lamphang na ka Party, i da rai i wow chaniah hei stat ki MLA ha ka Parliamentary Party yeiyi u phah, lada ymye ki wow rai ye won ki wow rah ha ka Party ka wow pyrkhat lang chwa wow chim ya ka rai,” da ong u Senior Working President ka UDP, u Bindo M Lanong hawa yaklam wa kiwa pathai khubor.

U Bindo da ong u leh wa ka CEC sñiaw ko wow e ya kani ka kaam Lamphang toh u lai bait ko cha ka UDP kamwa man nadooh wa sdang.

Kam wow pynkynmoo, ka UDP em ko 8 ngut ki MLA wa kynthup lang ya ki arngut kiwa pynyabi (Associate), neiliang u heh ka UDP da ong u wa ki dkhot wa pynyabi leh ye ki wow chimkti ya ka chuki wa man ka bhah yong ka Party.

Related posts

Pynbna ka BJP ya ka thup wa nyngkong ki kyrtong cha ka KHADC wa JHADC

January 21, 2025

Kyrchaan ka Lumshnong ya u Grimlang Dkhar kam u kyrtong MDC na Narpuh Constituency

January 21, 2025

“Ka PP ye ko wow jied ya uwon uwon napyrdi ki 8 ngut ki MLA, wei lada chim leh da uwon uwon, hawa emlang ha ka sorkar, i hap i wow wa yakrehlang,” da pynrap u Dr. Jemino Mawthoh uwa man leh u General Secretary ka Party.

Heiyatoh won wa ka kaam President yong ka Party ka CEC da rai ko wa daw jied thymme ko ha ka yalang yong ka General Council ka wow man ha ka 11 tarik uni u bnai heiwa ka Party daw pynthymme ko ya waroh kiwa kitkaam.

“Hadooh wow man ka General Council daw yoh i ya u President wa thymme, wei ya katni ka CEC da ekti ko ha u Bindo wow yahkhmat ya ka Party,” da ong u Dr. Jemino.