Mih i awri nei thmu wow phiah ya ka chnong Pynthorumkhrah-Golflink

Shillong: Ka yalang yong ka dorbar chnong Pynthorumkhrah-Golflink wa da pynman du ya ki le tylli ki dong ynne ka sngi da mih i awri hadien sa ka Hima Mylliem da pynman ko yei thap Vote neibynta wow phiah ya ka chnong kawa em san tylli ki dong.

Kiwa pynlai chnong ka Pynthorumkhrah-Golflink da pynbaad ki wa ini i awri da mih i nei leh khlieh saiñpyrthai ka Hima Mylliem neibhah da khut yabor ko ya ka yalang yong ki le dong du neidaw wa kwah phiah chnong yong ki kattu katni ngut.

U Assistant Rangbah Shnong, u Michael Hek da ong u wa neiliang yong ka chnong da thoh ko cha u Acting Syiem ka Hima Mylliem wa lada khut ya ka yalang yong ki le dong ye wow mih i awri awra, tangwa wot hadien ini i pynsñiaw lyngba ka Executive Committee, neiliang ka yung krehkaam u Syiem ka Hima Mylliem da pynmih bait ko da ka hukum wow khut bait ya kani ka yalang ki le dong. Neiliang u Michael da dawa u wa u Syiem toh u pynche u hajrong i pynmih hukum yabor neibhah wa ini i leh pynyoo i wa em iyi iyi cha lyndet.

Ka dorbar chnong Pynthorumkhrah-Golflink em ko san tylli ki dong wa kynthup ya ka Khlieh Shnong, ka Pdeng Shnong, Lum Mawpun, Lum Sohkymphor wa ka Polo Hill wei katkam wa ong kiwa pynlai chnong da pynbaad ki wa u Syiem da ap u du ya ka Adhoc Committee wa da chna du da ki katto katni ngut ki bru wa poi chongkha ha ka chnong wow yoh noh da uwi u rangbah shnong neibynta ki le dong, kitæ ka dong Lum Mawpun, Lum Sohkymphor wa Polo Hill.

Lai ood ki MDC ka VPP ha ka sorkar wym yoh Scheme sorkar pyrdi ha ki Constituency wa em ha sor

May 13, 2025

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

Neiliang u Treasurer ka dorbar shnong, u SM Lyngdoh da ong u wa u Acting Syiem da phah pynman u ya ka Executive Committee wow tip katwon ngut kiwa kwah wow yoh noh da kawi ka chnong wei katwon ngut kiwa pyrchah, wei ha kani ka Committee wa em dkhot 26 ngut, em du le ngut kiwa kwah wow phiah chnong katwa 23 ngut won kwah ki wow neh ko kamjooh.

U President ka Seng Samla da kylli u ya u Acting Syiem uwa ym em burom ya ka rai ka Executive Committee, tangwa da ap pathan u ya ka u Adhoc Committee yong ki kattu katni ngut wei da phah pynman ya ka yalang neibynta wow thap Vote.

Ka chnong hi nadooh wa sdang ym em tipmit ko ya ka Adhoc Committee, tangwa u Syiem da tipmit wei da ap u ya ka iwa man pyrchah yei mon ki paidbah.

Hadien ini i awri neiliang ka yung krehkaam ka Hima Mylliem da phah sangeh noh ko yei thap Vote wei ki montri ka hima da kular ki wow rah yeini cha u Acting Syiem.