Shillong: U General Secretary ka All India Regional Rural Bank Employees Association u SV Ready da ong u wa ka seiñ da dawa ki na ki bor pynlai ka Bank wa hawa thung kreh toh u phah da ki bru na ka thaaiñ wa sñiawthooh yei ktien.
Hawa yaklam wa kiwa pathai khubor ynne ka sngi ha Shillong hadien ka yalang yong ka Meghalaya Rural Bank, u Reddy da ong u wa kam ka seiñ da dawa ki da slem bha na ki bor pynlai, tangwa katni da em i leh kulmar heiwa da phah da ki bru ki wymtoh na ka jylla wei ini da booh i hei eh i khoo ya ki paidbah ki wym sñiawthooh ya ki ktien ki baar jylla.
Da ong u leh wa ha ka Exam thung kreh ha ki Rural Bank ha ka ri waroh kawi da pynman du kawi ka Exam khlem em i pyrchah, tangwa i pyrchah toh wymhoi u phah da ki bru ki wym toh na ka jylla kawa wan ki, wei lada ha Meghalaya toh wow thung da ki bru na Meghalaya hi wei ini toh u man i kamjooh cha kiwi ki jylla leh.
Neiliang ka seiñ da dawa ko na ki bor ka Rural Bank wa neini chakhmat lada em i thung kreh toh u thung da kiwa na jylla hi neibhah kiwa boon ki chnat ka Bank toh kiwa na nongkyndong.
Chooh chooh da ong u wa ha Meghalaya ki Scheme sorkar wa yatoh wa ki paidbah, 70% na ki lai ki lyngba ka Meghalaya Rural bank.
Heiyatoh wa i wai ya ki chnat ka Bank, da ong u wa i eh mih i neidaw wa ka RBI da booh ko ya ki kyndon wa hapoh chi snem toh wow yoh lap ka Bank wei heijooh i por kiwa pynlai toh u pynduna ki ya ki wakreh.
Discussion about this post