Jowai: Ka Khasi Students’ Union-War Jaintia Circle hapoh i yahkhmat u President u Laitphar Syngkrem wa u Finance Secretary u Kindly Khyriem ha ka 13 tarik uni u bnai da lai yachem ki ya u Lahkmen Rymbui u montri ka chnat Education, Forest & Environment Department wa Border Areas Development Department hapoh ka kamra krehkaam yong oo neidaw wa ym em Block Development Officer (BDO) hapoh ka C&RD Block, Amlarem kiwa pura.
Ka seiñ da ong ko wa hadooh katni hapoh Amlarem dang neh ha i pait ka J.U. Kharpuri kawa man leh ka Sub Division Officer (Civil), Amlarem kawa haap wow pait ya ki ar tylli ki yung krehkaam wa heh hapoh Amlarem.
Hawa yatoh wa ini, neiliang u Lahkmen da pdiang u ya i tkoh kawa khroo ya i rukom krehkaam lada ym em sahep ha yung krehkaam sorkar wei da yaleh chitom u wow thung pura smat ya ki sahep wow chimkti ya kani ka kaam khnang wa ym em i thut ka kaam ka jaam ki paaid ka War Jaiñtia.
Ka seiñ leh da yaklam ko wa u MLA hajrong i sih u sarok nadooh na Lad Moophlang chadooh jan Jowai neidaw wa kani ka sarok kawa da chah ieh khlem em iwon iwon i pait næ i pynchna ka sorkar, kawa man leh ka sarok næ u budloom ka lai ka wan ka khayi pateiñ hapoh War Jaiñtia.
Neiliang u MLA da ong u wa da yoo ya ini wei da dep pynlait poisa neibynta uni u snem wei ym slem de da chan pynmiat ya uni u sarok.
Ini toh katkam wa pyntip da u General Secretary Samla Lurman B. Talang.
Discussion about this post