Jowai: Ka Thomas Jones Synod College Jowai, ynne ka sngi da leh burom koyi ki khynroo khyllood puræ kiwa da pyndep yaka puræ na kani ka College nalor wa da e khusnam leh ya kitu wapoi chakhmat haka Result HSSLC wa Degree hei emlang u O. Liting, Executive Secretary, In-Charge CED, KJP Synod Mihngi kam u kongsan, u Principal ka Thomas Jones Synod College u Dr. R.R.Kharkongor, u B.N.Lamare, kiwa sikai wa kiwa lai puræ ha kani ka thaw.
U O. Liting hawa e yei klam da yaroh u yaki khon khynroo khyllood hajrong i ye ki wow kap cha uwi won u moomer lyngba i kreh chitom yong ki kamjooh i yah luti u Principal wa kiwa sikai.
Da pyn-eh bok eh nasib u yaki wow nang ku ki chaphrang kamjooh wow em i kyrmen hawa leh yeiwon iwon hei im yong ki, u kynmoo yei sneiñ i khroo wa jooh yoh heipor wa dang puræ, wei kamjooh man ki por toh u mang wow poi chaka thong yong ka mynried wa tyrchaiñ.
Ki khyllood yong kani ka College wada yoh khusnam haka Result HSSLC kynthup ka Eliza Lyngdoh (Arts Stream) wa ka Bettica Lyngdoh (Commerce Stream).
Haka Result Degree da e khusnam yaka Hansaka Pde hajrong i yei ko wow poi haka kyrdan 9th Position Merit List yong ka Result wada pynbna daka NEHU, nalor ki 3 ngut kiwi won wapoi haka kyrdan nyngkong wa kynthup u Johnmin Pohleng, ka Melissa Rolice Laloo wa ka Konika Susngi.
Neitæ yei naam Student of the Year da e cha u Johnmin Pohleng waka Kathleen Bonnie Rapthap.
Neiliang ka kynhun Theatre Club yong kani ka College leh da chim ko ka lad wow saam Certificate chaki khynroo khyllood wa jooh chimbynta haki Drama waphær waphær.
Discussion about this post