Shillong: Ka sorkar jylla ynne ka sngi da wanrah ko yaka Meghalaya Private University Regulatory of Establishment and Maintenance of Standard Bill, 2019 haka sngi nyngkong ka dorbar ka yung chna aiñ ka sorkar jylla.
Ya kani ka Bill da wanrah da u montri ka chnat puræ puthi, u Lahkmen Rymbui yow em ka aiñ wow pait ya i rukom krehkaam ki University wa pynlai da ki bru samen hapoh ka jylla namo ki Private University.
Ka Meghalaya Private University Regulatory of Establishment and Maintenance of Standard Bill, 2019 daw mih ko heithaw ka Meghalaya Private University Regulatory of Establishment and Maintenance of Standard Act, 2012.
Kani ka Bill toh ka wow bood ya ki kyndon katkam wa pynmih ka Supreme Court heiyatoh waka mukotduma wa da yaleh haka Supreme Court kawa da yaleh u Prof. Yashpal pyrchah yaka jylla Chhattisgarh wa kiwi kiwi.
I thong yong kani ka Bill toh yow pyntikna wa ki Private University wa da seiñ hapoh ka jylla wa kiwi ki Private University kiwa e sikai hapoh ka ri deiwa yakrehlang wa ki University na baar ri, kam ha ki Distance Education wow bood ki ya ki kyndon wow e yaka sikai wa katkam ka kyrdan wa da booh, ki thaw puræ wa biang, i rukom pynman Exam, ka bai lai puræ wa kiwi kiwi yow pyntikna wym chah thok kiwa lai puræ.
Kani Bill u wanrah ko leh yaka kyndon wow chna ya Meghalaya Higher Education Council, katkam ka Section 10 ka wow yarap yaka sorkar ha ki kaam puræ puthi kawa da pynemkaam leh hapoh ka Meghalaya Higher Education Council Act, 2018 (Act No. 3 of 2018).
Hapoh kani ka Bill daw chna leh yaka Regulatory Board ka wow em u Chairman wa ki le ngut ki dkhot ki wow thung da ka sorkar jylla heiwa ki dkhot toh u man ki kiwa da em haka kaam sikai kiwa da chemphang haka kaam puræ puthi.
Kani ka Regulatory Board na ki por cha ki por daw lai sylli ki ya ki Private University kiwa da em chwa hapoh ka jylla ya i rukom krehkaam ki.
Hadien wa da pyndam yaka Meghalaya Private University Regulatory of Establishment and Maintenance of Standard Act, 2012, u montri ka chnat puræ puthi da wanrah u leh yaka CMJ University (Amendment) Bill, 2019, ka Techno Global University (Amendment) Bill, 2019, ka University of Science and Technology (Amendment) Bill, 2019, ka Institute of Chartered Financial Analyst of India (Amendment) Bill, 2019, ka Mahatma Gandhi University (Amendment) Bill, 2019, ka Martin Luther Christian University (Amendment) Bill, 2019, ka William Carey University (Amendment) Bill, 2019 waka Maharashtra Institute of Technology of Meghalaya (Amendment) Bill, 2019.
Discussion about this post