Shillong: Ka General Council yong ka United Democratic Patry (UDP) ynne ka sngi da pynskem ko ya u Metbah Lyngdoh kam u President wa thymme namo wa pura ka Party.
Ya i pyrtuid u Metbah da wanrah ha ka General Council da ka Nomination Committee wa da thung chanam wow thooh ya u President ka Party. Ini i jied ya u President thymme toh hadien wa khlaad noh u heh ka UDP, u Dr. Donkupar Roy ha ki kajak bnai wa dadep.
Neiliang u Metbah da ong u wa man i iwa sñiaw burom wa ki wakreh kamjooh ki dkhot ka UDP da mynjur lang ki wow jied ya oo kam uwa yahkhmat wa thymme ka Party deiwa kular leh wow kreh chitom wow pynkhlan ya ka Party.
U Metbah da kyntu u ya waroh ki dkhot ka Party wow kyrchaan lang ya oo ha ini i lai luti kam uwa yahkhmat ka Party wei wow man ki kiwa sñiawthooh yumut kamwa da yah luti u Dr. Donkupar Roy.
Ha iwi i liang u Metbah da ong u wa dadep ya phyllu yumut bha wa ki dkhot chwa wow chim ka rai wow man u kyrtong neibynta ka chuki Lamphang kawa man leh kawi ka laad wow pynku ya ka UDP.
Hadien ka General Council ka Party hawa yaklam wa kiwa pathai khubor u Metbah da ong u wa kiwa yahkhmat wa hakhmat ka Party daw chong yalang ki wow pyrkhat ya i rukom krehkaam ka Party hajrong ki phang wa emkaam ha kini ki le snem tam ki wow wan neidaw wa em ka Party ha ka sorkar.
Hawa kylli, da ong u wa i jied ya oo kam uwa yahkhmat ka Party toh katkam wa yoobiang ka Nomination Committee kawa da phah won yei pyrtuid u cha ka General Council.
Chooh chooh u Metbah da ong u wa kam uwa yahkhmat daw bood u ya ki dak kjat u President wa da khlaad noh, u Dr. Donkupar Roy da sdang u khamtam wow wanrah yei yatylli hapyrdi ki seiñ ri-loom kiwa em ha ka jylla.
Discussion about this post