Jowai: Ka Society for Environment Protection and Sustainable Development (SEPSD) da kyntu ko yaka Meghalaya State Pollution Control Board (MSPCB) wow pynsmat wow leh yaka Air Testing wow thooh bniah ya i man ka la-ær wa mih naka kharkhana thang mooyong ka Abhi Coke wa em ha chnong Mookhep East Jaiñtia Hills District.
Ka SEPSD ha u Naiynru (June) 2019 deilang wa ki Engineer ka MSPCB da lai hiar ki wow sylli ya katai ka karkhana hadien waka Society da e dorkhat ko cha u montri ka chnat ka chait ka khiah ka sorkar jylla hajrong ka yurim wa katai ka karkhana da pynmih ko yaka la-ær wa tngit wa ki pum pum kawa ktah yaka chait ka khiah kiwa chong chnong wei khamtam yaki khynnah skur yong ka skur Good Shepherd Secondary School kawa em hajan katai ka karkhana.
U Vice President ka SEPSD u JR Dkhar da ong u wa neidaw wym miat ka suiñ bneiñ ha i por wa wan sylli neidaw wa em u slap ym em ye wow pyndep yaka Air Test, wei u Engineer ka MSPCB da ong u wa daw leh noh yaka Test manda kut u slap khnang wa ka Test u man ko kawa che.
Chooh chooh neiliang u Vice President da kyntu u yaka MSPCB wow pyndep noh ya katai ka Test neidaw wa wa kini toh ki bnai wa sdang duna u slap.
Discussion about this post