Jowai: Katkam ka khubor wa da phah da kiwa yahkhmat ka North East Indigenous People Front (NEIPF) Youth Wing South Eastern Border Region, East Jaiñtia Hills District, ka seiñ da pyrshah joor ko ya iwa mut u chna karkhana thang mooyong (Coke Plant) hapoh ka thaaiñ wa hapoh ki so tylli ki chnong kitæ ka chnong Diengsahtlang, Ladwapung wa ka Umsatai Pynurkba.
Kamtæ ka seiñ da kyntu ko ya kiwa chong chnong wa ki paidbah wow pyrchah joor ya kini ki karkhana thang mooyong neibhah lada wan ka karkhana daw chah ktah kani thaaiñ neidaw waka karkhana daw pynmih ko yaka la-ær wa tngit wa ki pum pum kawa ktah yaka chait ka khiah kiwa chong chnong wei khamtam ya ki khynnah skur yong kani ka thaaiñ kiwa em hajan ki karkhana.
Ka seiñ da pynsñiaw ko yei eh i khoo kiwa chong chnong yong kani ka thaaiñ daw chem ki lada wan ka karkhana thang mooyong, daw ktah ko ya ki kaam yada rymaw kiwa da yahkhmat ka NEIPF kiwa kynthup ya u President ka South Eastern Border Region u Letmon Pyrtuh wa u Secretary u P. Surong, kamtæ da kyntu joor yaka Meghalaya State Pollution Control Board (MSPCB) wa ym hoi u e ya ki Clearance Certificate ya kiwon kiwon ki karkhana thang mooyong (Coke Plant) hapoh East Jaiñtia Hills District.
U President ka (NEIPF) Youth Wing South Eastern Border Region, East Jaiñtia Hills District, u Letmon Pyrtuh da ong u wa neidaw wym miat daw wanrah ko yei eh wa chiboon ya kiwa chong chnong khamtam daw wan ki kjut ki chitom, nalor wa kiwa chong chnong man ki kiwa dooh wa duk ha kani ka thaaiñ wei boon na ki wa im ja kpoh ha ki kaam rep, kamtæ ka seiñ da kyntu joor ko ya ki paidbah wow pyrchah joor ya kini ki karkhana.
Discussion about this post