Yoh kem ki pulit ka EJH sa arngut ki nong Nigeria, da poi waroh kattu 14 ngut

Jowai: U SP ka East Jaiñtia Hills u V. Singh da pyntip u wa ynne ka 16 tarik da yoh kem sa arngut ki nong Nigeria kiwa psiah tooh chapoh ka ri India wei kattu da poi waroh ki baar ri 14 ngut heiwa uwi na ki toh uwa naka ri Ivory Coast katwa kiwa sah toh naka ri Nigeria kiwa waroh ym em yaka Indian VISA wow psiah chapoh ka ri. Kiwa chah kem ynne ka sngi toh u Chidera Stanley Enemmuo (29 snem) wa u Nnaemeka Joshua Anorue (35 snem) waroh ar toh kiwa naka ri Nigeria. U SP da pyntip u wa waroh toh kiwa wan na Nigeria cha Dhaka, Bangladesh deiwa hær ha ki tarik waphær waphær, wei da em wa yarap ya ki khajik chisien wow kit ya ki da ka kari yow poi ki cha u pood ka Bangladesh waka India. Hadien ini da lai ki dei kjat yow kaap chapoh ka ri India wei da em won sa ki bru neiliang ka ri India wa yarap ya ki yow poi ki hadooh Silchar wei na Silchar won da ku Bus ki yow lai cha Guwahati ha ki tarik waphær waphær. Hawa pynman yaka takit uwi na ki wa tip kam u Obey Sunny (38 snem) da phla u wa da em ka mutkotduma pyrchah ya oo wa sah u hapoh ka ri India palat yei por wa chah ya oo haka jylla Goa wei yaka Passport yong oo da chah knieh ha ki bor ka aiñ. Kiwi won da kam ki wa ki toh kiwa yalehbol wei da psiah tooh ki na Bangladesh cha India deiwa yooluti wow yoh u yalehke ha ki Football Club ka India wei wow kreh ha ki karkhana pynmih that. Ya ini waroh iwa kam ki dang pyntikna ki pulit wei wow tip leh na iyi i daw wa wan syndet ki pyrchah yaka aiñ chapoh ka ri wei iyi i thmu tre yong ki. Neiliang u SP da kyntu u ya ki paidbah wa lada em wa tip chaphang ki bru wa yarap ya kini ki bru wow psiah tooh ki chapoh ka ri wow phone ki ha u numner 9485178835/7005225721 wei ye leh u email: [email protected] lane ha [email protected] wei ya kiwa pyntip daw murieh yei pyrtuid yong ki.