Shillong: Ka Confederation of Meghalaya Social Organisation (CoMSO) da pynbna ko wow pteiñ yei pyrchah ya i wym bien ka sorkar wow pynpsiah ya ki kyndon Inner Line Permit (ILP) ha ka Meghalaya Residents Safety and Security Act, 2016, ha i jooh i por da khut ko leh ya kiwi ki para seiñbhalang wow wan ha kajooh ka yung neibynta katai ka thmu wow yoh ya ki aiñ yada ya ka jaitbru deiwa booh chadien yei sñiawheh (Ego).
Yow pynjoor ya ka dawa na ka sorkar wow wanrah ya ki aiñ wa khlan yow yada nei buhai chnong ki poiwiar, ka CoMSO ynne ka sngi da pynman ko yaka yalang paidbah ha Motphran, Shillong wei ha kani ka yalang da thai i dawa ya ka ILP wow beiñ leh yei mutlop ka ka sorkar wow pynkylla ya ka MRSSA, 2016 ha ka dorbar ka sorkar kawa dang kut.
Hawa klam ha kani ka yalang, u Chairman ka CoMSO uwa man leh u President ka HYC, u Robertjune Kharjahrin da beiñ joor u yaka sorkar wa ka sdang ko wow kyllaiñ wot hadien wa ka da kular ko wow wanrah noh ya i pynkylla ya ka Meghalaya Residents Safety and Security Act (MRSSA), 2016 ha ka dorbar.
Da beiñ u leh ya ki 60 ngut ki MLA wa lada ki nood ki toh u ong che ki mynstep deiwa che wa ki pyrchah ki yaka ILP wei toh u pynbna syndon ha ki laad pathai khubor ym toh wow lai nadien nadien wa ki baar ri, da ong u leh wa kiwa kwah ya ki aiñ ILP ki da pynsñiaw ki tangwa kiwa pyrchah iyi i daw wow tieñ ki lada pyrchah lada man chynrang ki.
Ha i jooh i por u Kharjahrin da ong u wa ka seiñ la chisnem da yaleh ko wow pynbiang ya kini ki aiñ deiwa e yumut cha ka sorkar, tangwa ym em won kiwi ki kynhun kiwa man chi payu wa em i jooh i thmu da paitke donhi ki yaka seiñ, wei ki pynsangeh ki ya i lai luti ka seiñ nadooh wa sdang wow lai luti lang.
Da ong u wa ka seiñ ka smat ko wow phet lang wow leh ya iwa emkaam wow ya phyllu yumut, da ong chooh chooh wa lada waroh ki em ki ka jooh ka thong ym em i eh wow chong phyllu yumut lang, wei ka CoMSO man ko kawa smat wow ya krehlang wa kiwon kiwon ki seiñ wow yada ya ka jaitbru neidaw wa ka seiñ ka emkaam ko yaka ILP ym ya i sñiawheh.
Uwa yahkhmat ka CoMSO da ong u wa lada kiwi ki kwah ki wow yahkhamt ym phær wei ka seiñ u bood ko nadien du ha kawi ka kyndon, itæ toh wym pynkylla de yaka ILP wei ym cha ka luti kawa bakla.
Kiwi de kiwa e yei klam ha kani ka yalang wow dawa ya ki aiñ wow yada ya ki tre chnong wa khian paid da kiwa yahkhmat ki seiñgbhalang wa em hapoh ka chatri yong ka CoMSO kynthup na u President ka JSU Central Body, u Lawyerson War, u President ka WKSU u D. Sun, President ka CoRP u B. Ryntathiang, u G.S. ka WYF u D. Marwein, u Organising Secy ka HANM u Hamar Lyngkhoi, u President ka EJNC u Sambormi Lyngdoh, u President ka JSU Shillong City u Treibor R. Suchen, u Vice President ka HYC u D. Kharlyngdoh wa u Chairman ka AGJAC Nikman Ch Marak.
Discussion about this post