15 49.0138 8.38624 1 0 4000 1 https://wyrta.com 300 0
Advertisement ad1
Advertisement ad1

Yoh sikai kiwa dai baam rood sarok yow man kiwa lehkhooid

0 Comments
Advertisement ad1

Shillong: U montri ka Health & Family Welfare u A.L. Hek ynne ka sngi da wai u yaka e sikai wa chi sngi ya kiwa dai baam cha rood sarok (Street Food Vendors) haka yalang wa pynman ha Aurobindo Institute of Indian Culture, Shillong. Ya kani ka esikai da pynman da ka Commissionerate of Food Safety, Meghalaya deiwa ya krehlang waka Nestle India Limited deilang waka National Association of Street Vendors of India (NASVI).

U Hek da ong u wa kiwa dai baam emkaam ki ym du wa dai ya i baam wa khooid wei emkaam leh u pyntikna wa ki kchu wa kiwi ki tiar wa pynemkaam ki leh u man ki kiwa khooid yow ye ki u chet ya i baam wa i biang u baam ki bru, wei ini toh u myllien u leh man ka sngi wei daw pynku ko leh yaka khih ka khan yong ki. Da ong u leh wa kiwa dai baam rood sarok emkaam ki u yoh ya ki sikai yow man kiwa lehkhooid kamjooh wow dai ya ki baam wa biang wa bha iwa man leh i hok yong kiwa thied baam.

Hawa klam yei ka-it ki paidbah katni ya ki baam dai cha rood sarok namo ki Street Food ha kylleiñ ka pyrthai, u Secretary ka sorkar Meghalaya, Health & Family Welfare Department, u Pravin Bakshi da ong u wa i bha i bang i baam toh iwa taan ya kiwa thied yow wan ki cha kiwa dai baam na rood sarok khatam katni ka jylla da man ko kawa wan kiwa boon kiwa uiñke suwari wei daw yarap ko ya kiwa dai baam rood sarok yow pynku ya ka yoh ka kot yong ki deiwa dai ya ki baam wa bha wa bang wa kiwa chait wa khiah.

Ha kani ka yalang da saam leh ya ki tiar ki tar wow chet deiwa khooid wa suba kamjooh ki Certificate cha kiwa dai rood sarok kiwa yoh sikai.  

Kiwi kiwa emlang ha kani ka sngi toh u Joint Commissioner of Food Safety, Meghalaya, u S.N. Sangma, Director (Corporate Affairs), Nestle India Limited, u Sanjay Khajuria waka khlieh yaka Street Food Program, NASVI, ka Sangeeta Singh.

Ka ‘Project Serve Safe Food’ toh kawa sdang ha u snem 2016 kawa yaleh wow pynku wow e sikai ya kiwa dai baam rood sarok wei nadooh wa sdang yaka, hadooh 14,000 ngut kiwa dai baam da yoh sikai ki ha ki 12 tylli ki jylla.

Yow pynheh ya kani ka ‘Project Serve Safe Food’ hapoh ka ri, ka Nestle India Limited deiwa ya krehlang waka Commissionerate of Food Safety, Meghalaya waka National Association of Street Vendors of India (NASVI) da sdang ya kani ka jooh hapoh ka jylla Meghalaya yow sikai ya palat 500 ngut kiwa dai baam rood sarok. Hadien ka Shillong, daw pynman ya kani ka e sikai ha Sohra wa Tura ha uni u bnai wa u Khonchonglad (Nov) uni u snem.   

Advertisement ad1

0 Comments

Leave a Reply