Jowai : Ynne ka sngi hadien ka yalang wada pynman ha kini ki tayaw wada dep ki dkhot ka Muster Roll Workers’ Union – Jaiñtia Hills District ynne ka sngi da yamih paidbah ki wow pynsñiaw yei hok yong ki iwa ym jooh yoh ki naka sorkar.
Ya kani ka lai paidbah da sdang na District Library Auditorium, Jowai heiwa ki manbei, manpa, khynroo wa khyllood da yachem ki wow lai paidbah cha ka yung krehkaam u Deputy Commissioner, West Jaiñtia Hills neitæ won cha Madan Daimasi, Ladthadlaboh.
Hachwa u sdang kani ka lai paidbah da em ka yalang wa tbian heiwa da yoh yei klam na u President ka Union u ma I.J. Dameki Paswet uwa da pynsñiaw ya ki mat wow paan ki naka sorkar. Wei da yoh leh yei klam na u Advisor ka seiñ u ma Lamsalanki Pariat uwa da kyntu ya waroh ki dkhot wow yatylli ki neibynta i hok yong ki.
Ha ini i lai paidbah ki da man i iwa jai jai wei manda poi haphrang ka Office u DC da sangeh ki wei kiwa kitkaam ka seiñ da yachem ki wa u DC u Arunkumar Kembhavi heiwa da e ya oo ka Dorkhat wa em ki mat wa paan ka seiñ kiwa man leh ki hok kiwa toh u yoh ki.
Ki mat kiwa ka seiñ da booh ko haka Dorkhat toh:
- Yow wai noh yaka Service Book neibynta waroh kiwa kreh Muster Roll ya kiwa da pynskem hapoh 6 bnai.
- Yow sdang yaka General Provident Fund Account hapoh 6 bnai nadooh wa mih ka hukum pynskem kreh.
- Yow sdang noh yei su kam ka D.A., C.A., bai chah sumar (Medical expenses), wa kiwi kiwi.
- Yow e noh yaka baibaam tymmen (pension), gratuity, wa kiwi kiwi katkam ki kyndon ka Pension Rules mar ya chong ngiah.
- Yow booh yaka rukom su tulop, ka pension, G.P.F, katkam ki kyndon aiñ wada em katni.
- Yow pynstiñ yei pynskem kreh naka 10 snem ter ter chaka 5 snem deiwa chna pynwandur (amend) yaka Para-3 yongka “The Meghalaya Regular Casual Workers Scheme, 1996.”
- Weiwow e kawon kawon ka hukum næ ki hukum kiwa yoobiang kiwow myntoi kiwa kreh kam ki Muster Roll.
Discussion about this post