Shillong: Ka Bharatiya Janata Party (BJP) da pynbna ko ya u Joshua Warjri kam u kyrtong neibynta ka Election chiteiñ samoi na Shella Constituency. Ya i pyrtuid u Joshua da pynbna hadien wa mynjur da kiwa yahkhmat ka BJP na Delhi hadien wa da phah ya ka rai yong ka Party na kani ka jylla.
Ya i pyrtuid u Joshua uwa na ka chnong Ichamati, da pynbna paidbah da u MLA ka BJP na South Shillong, u Sanbor Shullai hei emlang u President ka Party, u Shibun Lyngdoh wa kiwi kiwa yahkhmat ka Party ha kani ka jylla.
Hawa klam wa ki laad pathai khubor u Shibun da ong u, “Ka Shella toh ka Constituency wa ka Party ka em kyrmen ko wow yoh ya ka thong, neidaw wa hadooh katni da em soo hajar chiteiñ kiwa da pynpsiah dkhot pyn da ki ya ki hi cha ka BJP na katai ka Constituency.” Da pynrap chooh chooh deiwa ong wa i em kyrmen ka Party toh neidaw wa da yoh ko san hajar duna ki Vote tang du na Shella ha ka MP Election kawa pynman ha uni u snem.
U President ka BJP Meghalaya da pyntip u leh wa u montri ka sorkar Assam, u Himanta Biswa Sarma leh daw wan u wow yalap Election neibynta u kyrtong ka BJP. “Daw yaklam i leh wa ki montri rangbah ki jylla ka thaaiñ mihsngi wow wan yow yalap Election ya u kyrtong ka BJP ha Shella, kamjooh na kiwi kiwa yahkhmat na Delhi kam u montri khynnah ka DoNER u Dr. Jitendra Singh,” da ong u.
Hawa kylli ya i mih wow yakhun ya kani ka Election, u Joshua da ong u, “Kam u kyrtong ka BJP lada nga poi O cha ka thong, daw yakhun O neibynta kiwa dooh khamtam wa ka Shella Constituency katni da jæd da pai lut ko kawa emkaam ko ya yusap wa thymme.”
Discussion about this post