Shillong: Ynnin ka sngi ka Divine Saviour Parish Nongthymmai (DSPN) da lehwarom ko ya ka Parish Day heiwa da emlang ki Father, Sister, ki wakreh Balang kamjooh leh ki para wa ngait ka Parish Nongthymmai, Shillong.
Ha kani ka sngi da pynkup burom leh ya u khloor yalehke Martial Arts na Ri-loom Jaiñtia, u Ferdinand Suchiang uwa chong wa sah ha Nongthymmai Nongkynriem Block -2.
U Ferdinand toh uwa wanrah naam ya ka ri wa ka jaitbru hadien wa dadep yoh u ya ki 5 tylli ki takma ksiar wa kiwi kiwi ki takma ha ki lympung wa da pynman cha baar ri.
Kam wow pynkynmoo heini u Ferdinand da yoh Takma ksiar u ha ka Senior Male 57 kg ha ka lympung 2nd Hong Kong Tournament JeetKune-Do Championship 2017, ha u Naichiphaw (Oct) 2017, da yoh takma ksiar biang u ha ka 55 kg Men’s Category, ha ka Asian Cup Jeet Kune Do Championship 2017, wa da pynman ha Pattaya City, Thailand, ha u Khonchonglad 2017, ka takma ksiar ha ka Senior Male 55 kg ha ka 1st World Jeet Kune-Do Championship, ha National Stadium, Bangkok, Thailand, ha u Wisu (March) 2018.
Chooh chooh da yoh takma ksiar biang u ha ka Senior Male 55kgs yong ka 3rd International & Thai Martial Arts Games & Festival 2018, ka 14th World Wai Kru Ceremony & Nai Khanomtom Day Celebration, ha Bangkok, Thailand, ha u Wisu 2018, ka takma ksiar ha ka Senior Male 57 kg ha ka IMAO International Jeet kune do 2019, ha Alhaj Mokbul Hossain University College, Dhaka, Bangladesh yong uni u snem.
U Ferdinand da yoh u chiboon ki takma rupa, tama ha ki lympung wa da man cha baar ri wei da tipmit leh ya oo wow man u kam u Coach yong ka yalehke Martial Arts.
Discussion about this post