Khliehriat: Ka Rural & Urban Development Society, East Jaiñtia Hills District da pyrchah joor ko ya i ap paidbah namo ka Public Hearing yong ka Star Cement hajrong i thmu wow sdang ya ka paar tih moochuni ha chnong Brishyrnot, Elaka Narpuh.
Ka seiñ da ong ko wa i daw wa pyrchah ko ya kamni ka yalang toh neidaw wa kani ka paar jan bha ko wa ka Narpuh Wildlife Sanctuary wei haap ko hapoh ka Eco-sensitive Zone, kamjooh ka wah Lukha wei ini daw ktah bha i yei rukom im ki paidbah ka thaaiñ.
Chooh chooh da ong ko wa kani ka paar jan bha ko nei thaw sah ki bru wei daw ktah ko yei chait i khiah khamtam na ki laphooh ki wow ktah hawa riñ mynsien.
Ka seiñ da ong ko leh wa kani ka Company ym jooh bood ko ya ki soskular (Agreement) wa da soi heiyatoh wa i thung kreh da ki tre chnong næ jylla, wei ymjooh e myntoi ko ya ki tre chnong lait nei pynjæd tympra ya ka rymaw wa ki talawiar yong ka wei lada ebor ya ka wow tih, daw ktah bha ko ya ka rymaw.
Hajrong ini ka seiñ da thoh ko leh yei pyrchah cha ka Meghalaya State Pollution Control Board, Shillong wow pyndam noh ya ka.
Discussion about this post