Jowai: Ka seiñ Ri Jaintia Youth Federation (Central Body) waka Hynniewtrep Achik National Movement (HANM), Jaintia Hills Unit da thoh ki cha u Member Seretary ka Meghalaya State Pollution Control Board lyngba u DC ka EJH yow pynsñiaw yei pyrchah yong ki yaka Public Hearing ka wow pynman haka 19-10-19 ha chnong Brichynrot, EJH neibynta wow paan bor ka Star Cement wow sdang tih moochuni ha kani ka chnong.
Ki ar seiñ da ong ki wa i daw wa pyrchah ya kani ka Public Hearing toh neidaw kani ka thaw tih moochuni kawa heh kamwa 45.051 Hectare em ko hajan ka Eco Sensitive Zone ka Narpuh Wildlife Sanctuary iwa daw ktah ya ka rymaw wa ki mrad khloo wa em hapoh kani ka khloo.
Da ong leh wa kani ka thaw wa thmu wow tih moochuni toh kawa em hajan ka wah Lukha, wah Lunar wa ka wah Umsonallah ki wah wa pynemkaam da kiwa boon ki chnong, kamtæ daw ktah ko ya kini ki wah wa i khih i khan ki bru.
Ki ar seiñ da kam ki leh wa kani ka Public Hearing toh kawa du wow pyndep rukom, yow pynbiej donhi ya ki paidbah yow e laad yow tih moochuni wei ym em bood ya ki kyndon ka aiñ heiwa kamwa da jooh yoo wa ya u moochuni da sdang wow tih khlem da yoh bor naka Ministry of Environment, Forest & Climate Change ka sorkar India deiwa kam leh wa ka Supreme Court ha u snem 2012 da pynmih hukum ko wa emkaam wow yoh bor naka chnat ka sorkar India chwa wow sdang wow tih ya ki mar pohkhyndaw.
Chooh chooh ki ar seiñ da pynkynmoo yei noh khlemakor ka Star Cement ya u Fly Ash wa kiwi ki jakhlia wei da chem ya ki ha ka wah Lukha kawa ym em de pyrkhat ya ki doh um kamjooh ya ki bru kiwa chah ktah kiwa pynemkaam ya kani ka wah.
Ya kani ka chithi da phah leh cha ka Ministry of Environment Forest and Climate Change ka sorkar India, cha u Chairman Assembly Committee on Environment, cha u montri rangbah ka jylla u Conrad Sangma wa cha ka National Green Tribunal (NGT).
Discussion about this post