Jowai: Ki dkhot yong ka Kiang Nangbah Government College Student Union (KNGCSU), da pynchna hi ki ya ka madan yaleh Football ka College, neibynta wow yoh u pynemkaam ha ki yalehke waphær waphær yong ka yalehke kam chibynta ka College Week yong ka thaw puræ, wei ya ini i pynchna da leh ha kani ka 12 tarik wa da dep, wei yaka poisa da pyllang lang yow wanrah yaka pooh chiloom (Bulldozer) yow pynmiat yaka madan yalehke yong ka Kiang Nangbah Government College, Jowai.
Neiliang kiwa yahkhmat yong ka Student Union kiwa kynthup ya u Dawyoo Lyngdoh, President, u Wanbiang Pulang, General Secretary, deilang wa ki dkhot ka EC, da pynsñiaw ki yei sñiawkhia hajrong i wym ap næ pynsmat ka sorkar ya i dawa wow pynchna yaka madan yalehke hanlada da dep ki wow e dei thoh cha ki bor wa toh u pait kamjooh leh cha u montri wa toh u pait ya ka kaam Sports.
Neiliang kiwa yahkhmat ka KNGCSU da pynsñiaw ki leh ya kiwi ki emkaam wa hakhmat dooh yong kani ka thaw puræ, nalor ka madan yalehke, ka yung thaw puræ ka College kawa da ieh khlem niam rong de kattu la 20 tylli ki snem kawa da sih dur hadooh kattæ kattæ, i kær pood ka College leh ym pu em chna bha wot hadien wa ka Union da dep ko wow lai e dei thoh wei da yaklam leh waka chnat PWD lyngba u Principal ka College iwa da wanrah yei yoh ki bru u psiah u mih kulmar chapoh ka College wow pyntngit ka.
U Dawyoo da pyntip u leh wa ya ka Indoor Hall wa dep chna hadooh katni ym pu yoh wow pynemkaam ya ka, neidaw wa ym pu em wa wan wai ya ka (Inaugurate) da ki bor sorkar. Da ong u leh wa ka luti lai kjat (Footpath) ym pu em ha kani ka College, wei da dep yaklam ya ini wa u MLA ka Jowai u Wailadmiki Shylla, uwa da kular wow pynyoh Footpath ha kani ka College.
Chooh chooh heiyatoh wa ka tulop yong kiwa sikai step (Morning Section Teacher) yong kani ka College, neiliang kiwa yahkhmat yong ka Union nadooh ki snem wa da lai da dawa ki wow pynku yaka tulop yong ki neibhah kamwa man katni kiwa sikai step yong kani ka College yoh ki du T. 5000 chi bnai wei ini da booh ko yei eh kawa khroo ya kiwa sikai, kamtæ sa chisien ka Union da kyntu biang ko yaka sorkar wow pynku yaka bai bnai kiwa sikai step.
Neiliang u Wanbiang, General Secretary, da ong u wa hadooh katni kamwa 50 snem tam wa da em kani ka College, ym yoh yarap naka Scheme yong ki montri sorkar, wei em leh ki montri hawa kiwa yahkhmat ka Union lai ki wow paan yarap neibynta ki emkaam yong ka College, em ki montri kiwa ong wa kani ka College ym em ko hapoh ka Constituency yong ki wei ini da pynlyngngoh ko ya kiwa lai puræ kani ka College.
Discussion about this post