New Delhi: Ka India wa ka Pakistan ha kani ka 24 tarik da soi ki ya ka soskular wow pyllait luti ya kiwa ngait niam Sikh wow lai cha ka thaw wa kyntang yong kani ka niam kawa tip leh kam ka Kartarpur Corridor.
Kani ka Kartarpur Corridor toh ka luti wa pynyabi ko ya ka yungmane Gurdwara Darbar Sahib Kartarpur ha Pakistan wa ka yungmane Dera Baba Nanak ha Gurdaspur District wei kani ka luti jrong ko kamwa 4.7 km.
Kani ka soskular wa da soi hapyrdi ki ar ri toh wow chah ya kiwa ngait niam Sikh wow lai cha kani ka yungmane ha Pakistan khlem emkaam Visa.
Ya kani ka soskular da soi da u SCL Das, Joint Secretary (Internal Security) na ka Home Ministry ka India wa u Mohammad Faisal, Director General (South Asia) Pakistan Foreign Office.
Ki kattu katni ki bynta namo ki kyndon wa emkaam yong kani ka soskular man ki kamni hawah:
● Ki bru India na kawon kawon ka niam ye ki u pynemkaam ya kani ka luti.
● Ym emkaam Visa wow lai cha kani ka yungmane kawa em ha Pakistan
● Emkaam wow rah ya ka Passport wa dang krehkaam chirup wa ka Electronic Travel Authorisation
● Emkaam wow rah ya ka OCI Card
● Kani ka luti u wai ko nei step hadooh i janmiet wei kiwa lai hei step toh u liwan ki pyn ha ka jooh ka sngi
● Kani ka luti u wai ko waroh chisnem lait na ki sngi kiwa daw pyntip chwa
● Ki bru ye ki wow lai samen mo dei yonglang wei ye ki leh u lai dei kjat
Ka India haap phah ko ya ka thup ki pyrtuid ki bru wow lai 10 sngi chwa ka tarik wow kaap cha chiliang u pood wei wow pyntikna ya ka thup 4 sngi chwa ka tarik
● Ka Pakistan da kular ko wow pynbiang ya ki ‘Langar’ namo ki thaw chet heiwa yow ye u saam ya ki ‘Prasad’
Ka bai psiah cha kani ka luti u an ko $ 20 samen chisien psiah.
Neibynta wow register da e ya kawi ka website wei daw phah ya ki SMS wa email wow pyntikna ya ka registration 3-4 sngi chwa ka tarik wow lai heiwa dawe leh ya ka Electronic Travel Authorization ya kawa u rah ki chirup wa ki Passport heipor wa psiah ki ha ka Passenger Terminal Building kawa em ha India.
Discussion about this post