Jowai: U montri rangbah ka jylla, u Conrad K Sangma chirup wa ki montri yong oo, ynne da lai pait ki ya i thaw sah ki syiem yong ka Hima Jaiñtia iwa em ha Jaiñtiapur, Bangladesh.
U Conrad da hiar u cha Bangladesh ynne chirup wa ki le ngut ki montri wa kynthup ya u Sñiawbhalang Dhar, u Lahkmen Rymbui wa u Banteidor Lyngdoh kam chibynta na i hiar cha kani ka ri i wow neh soo sngi.
Ya u Conrad wa ki montri da synraan leh da ki bru wa pait ya ki kaam uiñke suwari namo ki Tour and Travel Agency napoh jylla.
Ka Meghalaya wa Bangladesh em ko chiboon i yatoh neibhah wa em da ki phaw hajar ngut ki Khasi Pnar wa Garo kiwa sah ha Bangladesh khamtaam ha ki thaaiñ khappood.
Ka Meghalaya em ko u pood wa 443 km wa ka Bangladesh wei na warim jooh em ki yaw khappood ya kiwa tip leh kam ki Border Haats kam ha Kalaichar wa Balat kiwa da pynkhai im biang ha ki snem wa dadep wow pyntikna yei yoh khayi wei neh i maya hapyrdi ki ar ri.
Ini i lai u Conrad cha Bangladesh da yooluti leh wow ye u pynku ya ka kaam uiñke suwari neibhah ka Meghalaya em ko chiboon ki loom wa yirngam wa ki um ki wah wa jngiar kiwa ye u pynwyrngia ya ki bru na Bangladesh.
Ha iwi i liang, ha Bangladesh leh em ko chiboon ki thaw kiwa sah parom kiwa na ki por ki syiem kiwa ye u riñ ya kiwa uiñke suwari napoh ka jylla.
Ka sorkar Meghalaya yooluti ko wow pynku yei wan kiwa uiñke suwari na Bangladesh ar chah ha kini ki 2-3 snem wow wan.
Also Read: Chah iehbeiñ ki thaw wa tei na ki por u Syiem Jaiñtia
Discussion about this post