Jowai: Ki MDC ka BJP yong ka Jaiñtia Hills Autonomous District Council wa kynthup ya u Lakhon Biam, u J. Treilang Suchiang, u Dawan Lyngdoh wa u Krison Langstang hei yaklam wa kiwa thoh khubor ynne ka sngi yooluti ki waka dorbar tlang yong ka JHADC kawa daw man wym toh de u duna ko yaka le sngi, neibhah wa ki da pynkhreh ki wow wanrah boon ki phang yaklam ha katai ka dorbar iwa yatoh wei eh i khoo ka Council, kamjooh leh heiyatoh waka imlang sahlang.
Da ong ki man i por ka dorbar yong ka JHADC kut ko du hapoh chikynta ar kynta wei chisngi arsngi, tangwa ha kani ka kynti i angnood yong ki toh wym hoi u duna yaka le sngi, khnang wa hapoh kitai ki sngi u rap yohlaad wow yaklam rap bniah neibynta i bha yong ka Council waka imlang sahlang hi waroh kawi.
Ki phang wa rap hakhmat dooh wa ki da pynkhreh ki wow wanrah heiyatoh i thung kreh yaki 56 ngut hapoh ka Council nadooh ka EC warim wa yahkhmat u Ex-CEM, u M.B. Rymbai, neibhah wa haka EC wa thymme hapoh i yahkhmat u Thombor Shiwat da dep thung ki yaka kynhun takit watip kam ka ‘Enquiry Committee on Alleged Illegal Appointment of Various Post in JHADC’, neibynta u bichaar bniah ya i rukom thung ya kitai ki 56 ngut wa toh hi mo katkam ka aiñ næ Service Rule yong ka Council.
“Yei por takit da booh wow pyndep hapoh ka 31 tarik u Naiynniaw (July) yong uni snem, tangwa hadooh kattæ wada palat le bnai leh kam ki MDC ym em yoh yutip ki iyi iyi leh heiyatoh wa kitai ki 56 ngut wa daw chah pyndooh kreh ki namo daw neh,” ong u Lakhon Biam.
Kamtæ kamwa ka dorbar tlang dajan sdang hi ko, neiliang yong ki kwah ki waka EC wa katni u wanrah ko yaka Report wada dep takit da katai ka Committee nalor wow saam leh cha waroh ki MDC neibynta wow yoh yei che.
Heiyatoh won wa i duna poisa ka Council pynsñiaw ki yei diaw deiwa ong, sa du chibnai arbnai da poi ka Christmas, ka New Year, nalor wa ki bei ki pa hap su bai skur khon, tangwa sñiawsih waka tulop won la 6 bnai ym pu em yoh, kamtæ dawa ki naka EC wow pynche hajrong kayi ka yurim wa em kani ka duna poisa, neibhah kani toh i eh wa khroo wei toh u chimkhia bha ki khnang yow lait u wanrah yei eh i chitom hadien habood.
Chooh chooh kwah ki waka Executive Committee u wanrah ko yaka Report heiyatoh wei sangeh pynkreh yaka Iawmusiang Market Complex kawa man ka pliang ja yong ki jaitbru Pnar. Wei da ong leh lada kani ka yaw neh bait ko khlem pyndep, boi ye u em ki bru wa chim kabu wow leh yaki kaam wa man pyrchah yaka imlang sahlang ha katai ka thaw wa chan yaka.
Sa iwi leh ong ki ka Jaiñtia Dorbar Hall wa em hajan Indica Stand Jowai-Shillong leh kamwa man katni i pynkreh da sangeh wym tip neiyi i daw.
“Hei yong sakhiat hi lada ya kitai ki Project ye wow pyndep heipor wa smat daw pynmyntoi ko chiboon yaki khynroo khyllood wa dooh khih dooh kreh deiwa seiñ yaki dukan wa kiwi,” pynrap u Lakhon Biam.
Also Read: Kular u Thombor Shiwat wow pyndam ya kiwa chah thung kreh sopsop ha JHADC
Discussion about this post