Shillong: U montri rangbah ka jylla, u Conrad Sangma ynne ka sngi lyngba ka Video Conference wa ki Deputy Commissioner yong waroh ki District wa ki sahep wow booddien ya ki programme wa ki Scheme yong ki chnat waphær waphær.
Ka yalang wa nyngkong da pynman hapyrdi wa ki sahep ka chnat Mining and Geology chirup wa ka Home (Police) Department wow yaklam hajrong ya ki kaam wa yatoh wa i tih mooyong, heiwa da pynsñiaw yei duna ki bor krehkaam khamtam wa u pood wa ka Assam wei da paan yarap na ka chnat Police Department wow yarap khamtam ha ki Entry & Exit Points wei wow sonteri hawa pynman ya ki kynreh.
U Conrad da kyntu u ya ki chnat wa yatoh wa ini i kaam wow man ki kiwa yakrehlang wak District Vigilance Committee khamtam chirup wa ki bor District.
Ka yalang wa bood toh hapyrdi ki sahep ka chnat C&RD wow booddien ya ki Scheme Rashtriya Gram Swaraj Abhiyan wa i booddien ya i rukom krehkaam ki VEC.
Ka yalang wa le toh wa ka chnat Commerce and Industries Department wow booddien yei krehkaam ka Prime Minister Employment Generation Programme ha jylla heiwa u Conrad da kyntu u wow pynkrehkaam hok ya ka khnang wow yoh myntoi hok ki paidbah.
Da pynman yalang leh wa ka chnat Department of Sports and Youth Affairs wow booddien ya ki project wa ki programme ka chnat khamtam wa yatoh wa ka Meghalaya Football Mission.
Ha kani ka yalang wa ka chnat, u Conrad da booddien u yei esikai ya kiwa dang khynnah namo ki Grassroot Training Centre kiwa em ha waroh ki District ha kylleiñ ka jylla neibynta ki khynnah kiwa hapyrdi 6-12 snem i rta.
Discussion about this post