Jowai: Ki dkhot yong ka Meghalaya People United Front (MPUF), East Jaiñtia Hills District, hadien wa yoh ki yei ood na ki khynroo khyllood ka thaaiñ East Jaiñtia, hajrong i slem yong ka sorkar wow pynmih yaka Result yong ka District Selection Committee (DSC), neiliang ka seiñ ynnin ka sngi da lai yachem ki wa u Deputy Commissioner, ka East Jaiñtia Hills District u F.M. Dopth, hapoh ka kamra krehkaam yong oo.
U DC da pynche u wa i slem wow pynmih ya ka Result yong ka DSC kawa da dep wow yaleh ya ka Written Test Exam nadooh u snem 2018, toh na i daw wym em u Secretary wei kattu daw wan noh u Secretary wa thymme hapoh ka District wei daw pynsmat wow pynmih noh yaka Result wa sahteiñ. U DC da ong u leh wa ha u Kmaichonglad (Dec) yong uni u snem daw pynmih noh ya kani ka Result, wei oo leh kam u khlieh yong ka District leh em u hapyrdi i lynga hajrong i slem yong kanu ka Result.
Hadien i yaklam wa u DC, neiliang ki dkhot ka seiñ da pynsñiaw ki yei kmen wa daw yoh noh yaka Result pyn ha u bnai wow wan kawa daw yarap ya kiwa boon ki khynroo ki khyllood ka District.
Discussion about this post