Jowai: Ynne ka sngi ka 14 tarik, u Deputy Commissioner yong ka East Jaiñtia Hills u FM Dopth da khut u yaka yalang neibynta wow pynkhooid wei wow pynim biang ya ka wah Lukha ha ka kamra krehkaam yong oo heiwa waroh ki sahep sorkar na ki chnat sorkar waphær waphær da wan ki cha kani ka yalang deilang wa kiwa kitkaam ka 6 Shnong Wah Lukha Association lait naka Meghalaya State Pollution Control Board (MSPCB) wa ka chnat Industries kiwa ym em poi cha kani ka yalang.
Ha kani ka yalang da yoh wow yaklam sani bha kammon wow pynkrehkaam wei wow pynlai yaka kaam chakhmat neibynta wow pynkhooid wei wow pynim biang ya ka wah Lukha. Da yoh wow batai lyngba ka pynyoo dur (Presentation) lyngba ka Google Map wa ki Satellite Map ya i chah ktah ka wah Lukha na u sahep naka na ka Water Resource Department.
Neiliang u Secretary ka 6 Shnong Wah Lukha Association, u Daiapherbha Lamare da pynsñiaw u yei sñiawngooh wa khroo ya u Deputy Commissioner ka East Jaiñtia Hills uwa da chimkhia ya kani ka kaam neibynta wow pynim biang ya ka wah Lukha wei da pynsñiaw u yei sñiaw diaw leh wa na i liang ka Meghalaya State Pollution Control Board (MSPCB) wa ym em poi ko cha kani ka yalang nalor wa da chah khut ha u DC wei da ong u wa em iyi iyi cha kylla hajrong i wym poi ki sahep ka MSPCB hanlada kattæ leh da yooluti u wa daw wan ki ha iwi tawan i por. Da ong u leh wa ha khmat u DC wa toh u leh wut wut ya kani ka kaam khnang yow man ko ka myntoi ya ki paiabah kiwa chong ba sah harood kani ka wah.
Neiliang u DC wa waroh ki sahep da mynjur ki wow pynman daka ka Joint Inspection yow sorjamin ya ki thaw wa chah ktah ka wah Lukha wei da pynbait wow lai haka 29-11-2019 heiwa daw lai lang nadooh u DC, ki Magistrate, ki sahep yong ki chnat waphær waphhær khnang wow ye u chim ya ka rai wa khaddooh wow leh kammon wow pynbha wow yada wei wow pynkhooid ya ka wah Lukha khnang wa ka wah Lukha u ye ko u khai im biang kam ha i por wa nachwa.
Discussion about this post