Shillong: Ki dkhot ka Joint Action Committee (JAC) ka Lyngdohship Sohiong ynne ka sngi da wan toor ki cha ka Khasi Hills Autonomous District Council (KHADC) wow dawa pyndam noh chisyndon ya u Lyngdoh ka Sohiong Lyngdohship u Bashemphang Thabah hajrong i pynbaad wa da lilam u ya i thaw ka Nongwah Mawtamur kawa em ha ri-Bhoi kawa toh ka yong ka Hima Sohiong cha ka Hima Jirang khlem da tip ki khon ki hajar.
Kini ki dkhot ka JAC kamwa 40 ngut da wanrah de ki da ki Placard yow pynrem ya ka KHADC kawa da suki ya ini i dawa yong ki wei hadien wa da yaklam wa u Chief Executive Member (CEM) ka KHADC u Teinwel Dkhar, u Deputy CEM u Pyniaid Sing Syiem hei emlang u EM wa kynthup ya u TW Chyne, u MDC ka Sohiong u Sherborlang Lyngdoh, u Bindo M Lanong wa ki dkhot ka JAC, da poi noh cha i sñiawthooh yumut.
Ka yalang da yakut wa ka KHADC toh u e khubor ko cha ka JAC hadien wa da kut i por wa da booh ya u Syiem Jirang wow e yaka bui (Report) chwa ka 25 tarik uni u bnai wei wow pynuiñ biang ya i thaw ka Nongwah Mawtamur cha ka Hima Sohiong wei lada ym mankam, ka JAC daw chim ko da kiwi ki laad ki luti.
U CEM wa u Dy. CEM ki da pynche ki wa em ka soskular hapyrdi ka Hima Jirang wa ka Hima Sohiong ha u snem 2015 ha i por ka Executive Committee kawa rim.
Da pyntip u wa i daw wa pynman yaka Hima Sohiong wow e kti ya katai ka thaw cha ka Hima Jirang toh neidaw wa da em jngai ware ko na ka Sohiong tangwa neiliang ka Executive Committee kawa katni hadien wa da yoh ya ka ujor, da pynbna wa da dep khut ya ka bichaar ya kiwa synchaar yong kini ki ar tylli ki Hima wei wow e yaka rai hadien ka 25 tarik uni u bnai.
Neiliang u Chairman ka JAC u Pasbhalang Kharryngngi da ong u wa ka JAC daw yang ko hadooh ka 25 tarik uni u bnai wei lada ym mankam kamwa da dawa, daw chim da kiwi ki laad wow yakhih.
Discussion about this post