Jowai: Ka Thomas Jones Synod College, Jowai deiwa ya krehlang wa ka Indian National Trust For Arts and Culture Heritage (INTACH) Meghalaya Chapter, ynne ka sngi da pynman ki yaka Workshop wa chisngi hajrong wow pynneh pynsah yaka riti dustur wa ki dak kti ki longchwa manchwa kawa da yarap poisa daka yung krehkaam u Deputy Commissioner WJHD wa ka Jaiñtia Hills Autonomous District Council.
Da chimbynta ha kani ka Workshop nadooh ki khynnah skur, kiwa sikai yong ki skur waphær waphær, u Dolloi ka Elaka Nangbah wa Elaka Nartiang haka yalang wa pynlai da u W. Lamin, Asst. Prof. Department of History, Thomas Jones Synod College, wei ya ki ktien pdiang da yoh na u Dr. R.R. Kharkongor, Principal Thomas Jones Synod College.
Kani ka Workshop man ko leh kam chibynta wow pynsñiawthooh paidbah hajrong i emkaam wow pynneh pynsah wei wow yada yaki riti dustur wa kiwa da chna da ki manchwa wa boonjait wa ki soodong sookun.
Ka Dr. Madeline Y. Tham, Convener, INTACH, Meghalaya Chapter hawa klam waiphang da ong ko ini toh i kamram yong i wow yada neibynta ki pateiñ wow wan. Wei hawa ong wow yada yaki soodong sookun kamjooh yei miat, kynthup i leh ya kiwa im wa em haka.
Da ong ko wa lyngba kam kani ka Workshop da khut da kyntu leh yaki seiñ waphær waphær, kiwa chong chnong kamjooh leh ya ki bru wa pawkhmat wa toh u pait yaki riti dustur wow ya saam lang yaka khubor cha ki paidbah hajrong i emkaam wow pynneh pynsah yaki riti dustur.
U kongsan ha kani ka sngi u Wailadmiki Shylla MLA 2-Jowai Constituency da yaroh u ya kiwa pynlai wa chim ki ya kani ka bynta wa emkaam, deiwa ong leh wa neiliang ka sorkar leh hapoh i yahkhmat u Conrad K Sangma da thooh laad ki kammon wow pynneh yaki riti dustur kawa man kawi naka spah wa kyrpang tam wa u Blai da kyrkhu u.
Kamtæ da yooluti u wa da i krehlang ki bor sorkar deilang wa ki paidbah da angnood wa daw man ko kawa mihsoh.
Kiwi dei kiwa klam toh ka R.S. Manner ADC West Jaiñtia Hills District, Dr. D.G. Lyngdoh, Asst. Prof Department of Philosophy, Thomas Jones Synod College wa kiwi.
Ha kani ka sngi da yoh leh yei klam na ki bru chemphang wa kynthup ya u Prof. Shobhan N. Lamare Department of History, North Eastern Hills University, Shillong uwa da klam hajrong ka phang “Of Colours and Other Forms of Aesthetics: Challenging Changelessness & Screening of Documentary”.
U Brian D. Kharpran Daly Author & Founding Member, Meghalaya Adventures’ Association uwa da klam hajrong ka Archaeological Heritage Assets, u D.R. Michael Buam, Independent Researcher & Filmmaker uwa da klam hajrong ka phang Rock Sculptures and Engravings in Jaiñtia Hills wa u H.H. Mohrmen, Writer and Social worker uwa klam halor ka Natural Heritage in Jaiñtia Hills.
Discussion about this post