Da pyllait paidbah ya ka kot “Ki katto katne shaphang ki katto katne – kynthuplang ka Behdieñkhlam ha Jowai ka hukum Blai”

Jowai: Ha kani ka 16 tarik uni u bnai da pyllait paidbah ya ka kot wathoh da u Riquoma Rq. Laloo ha Laloo Vaza, Upper Nongrim Hills, Shillong heiwa ya ka yalang da pyllai da u S. Quotient Sumer, u waman uwi na ki khroo pyrkhat wa uwa thoh kot hapoh ka ri waroh kawi. Dayoh ya ki kyntien ngoohblai na u Wanbi Laloo hachwa wow kut ka prokram, da e ya ki kyntien e khublei na u Ӕmlang Laloo. Kiwa wan sakhi ya kani ka pylliat kot da wan ki na ri-loom Jaiñtia, Shillong wa na kiwi ki thaaiñ nadooh na Pynursla na Ba-ñiuñ wa kiwi, wei daman ko, ka prokram kawa yoosuk wei yoo chongkun hadooh kattæ kattæ.

Hei klam yong u wathoh, da khana u yei lai luti yong oo hei yatoh wa katai ka kot, wa neiyi i daw wa pynman ya oo wow thoh hei ktien Khasi, kam uwa jooh thoh thoh hei ktien Jaiñtia Pnar, da beiñ joor u ya kitu ki prokram wajooh e ki ha DDK,Shillong, heiwa kiwa kylli wa kiwa jubab toh du ki Khasi hi, tangwa ki wan ya klam ki hei ktien phareng, i wym em u pynmyntoi ya kiwa pait, khamtam cha nongkyndong. Da e yaroh haroh u ya ka Khasi Author Society, hapoh i yahkhmat u Prof. D.R.L. Nonglait, heiyatoh wei thoh wa, ‘Waroh ki sahep sorkar yong ki chnat waphær waphær toh u klam ki dei ktien Khasi, lam tip ki leh, emkaam u chah sikai ki’. Chooh chooh kam ka dak wow ya embynta lang, yow rap khlan hei yaleh yow psiah ka ktien Khasi ha ka kyrdop waphra ka riti synchaar ka ri India, uni uwa thoh ong u, watoh u pynmih chiboon ki kot hei ktien Khasi.

Dayoh haroh i klam na ka Prof. Streamlet Dkhar, Dean School of Humanities, NEHU, Shillong, kawa da e i yaroh ya u Riquoma Rq. Laloo, kam uwi na ki khynroo waheh napoh ka thaaiñ Jaiñtia Hills, uwa em katæ ka mynsien wow kyntu ya ka ktien Khasi kam kawi na ki ktien pdeiñ hapoh ka jylla Meghalaya. Ong ko, yooluti ko, wa kani ka kot u psiah ko ha uwi pa kawi ki khon ka ri, khnang yow tip ki, deiwa thymme chaphang u Kiang Nangbah, ka Behdieñkhlam weiwa ka lynnong wa sñiawsuk dooh ko toh, ka lynnong “Ka Kynthei” kawa uwa thoh da chynna jngai u, watoh u kheiñkor ya ki kynthai; kawa man ka Bei, ka Khon, ka Payu ka Diah wa ka Kurim. Ong ko, ma deiwa ngam chooh chooh u sa kajiak hei yatoh wa kani ka lynnong, tæ daman sakhiat u, kam uwi na ki khroo pyrkhat hei yatoh weini.

U kongsan yong katai ka sngi, u Prof. D.R.L. Nonglait, President, Khasi Author Society; da khana u yeiwa puræ u ya kani ka kot chwa u chon ya ka, kawa phah u Riquoma cha oo. Dachem sakhiat u deiwa ong, wa johkhe uni uwa thoh wow pynpsiah haroh ya kawi ka lynnong,”Ka Shithi Sha ka Khun Jong u”, kawa man ka hikai, kawa e bor e mynsien, ya ki bei ki pa kiwa phah skur ya ki khon yong ki chajngai na chnong. Ha ka lynnong, “Ki Khana Lyngkot Shaphang u Kiang Nangbah”, u kongsan ong u, wa katkam uni uwa thoh, u Kiang Nangbah emlang u chirup wa i, hadooh katni leh. Da yaroh u ya kawi pa kawi ka lynnong yong ka kot, waman kam ki Essay wa uwa thoh da pynwandur bha u, weiwa, iwa ka-it dooh u toh, wa ha kani ka kot em i thoh wa pynyoo wa kipor nachwa, dang synchaar sakhiat i Hok, da ki kyntien klam donhi krehkaam ibor u thylliej. E bor e mynsien u ya uwa thoh wow nangtia chooh chooh u chakhmat hei thoh i puræ, deiwa ong, wa ka Khasi Author Society dang rapkhlan chooh ko, deiwa u Riquoma Rq. Laloo, u man u kam u dkhot thymme yong ka na ka thaaiñ Jaiñtia Hills.