Shillong: U MDC ka Congress na Mairang u Batskhem Ryntathiang da pynkhyrngiat u ya ki lok MDC ka Congress deiwa pynbaad ya ki heh ka Party katwa dang klam u hajrong ka phang Citizenship Amendment Bill (CAB) ha yung dorbar ka KHADC.
U Batskhem da pynbaad u wa ki heh ka Congress kiwa synchaar ha kini ki san snem wa dadep da leh Politics ya ka CAB deiwa pynman yakhih katwa ki won heipor wa dang em ki ha ka sorkar, ym em u leh ki iwon iwon wow e da ka aiñ Inner Line Permit (ILP) kamwa dawa ki paidbah.
Da ong u wa ka CAB lada ye ko wow man aiñ, da tikna wow chah tlep ha kiwi ki jaitbru neibhah wot khlem ka CAB leh da jan chah tlep wei iwa emkaam tam toh wow dawa da ka ILP.
Da ong u wa ini jia i nei leh stiñ ki sorkar warim wa yahkhmat u Dr. Mukul Sangma kawa ym ap yei dawa ILP, tangwa kini ki jooh ki bru da leh Politics ki deiwa mih madan wow yakhih pyrchah ya ka CAB.
Da ong u wa lada ki heh pteiñ ki wow leh kamni, daw mih madan u wow yakhun hawa chit wa rang.
Heijooh i por da pynbaad u ya ka UDP kawa em ha ka sorkar MDA, wa man ko kam ka rongser heiwa chna ya ka sorkar ha Meghalaya, wei toh u hukum ko ya ka sorkar wow pynkrehkaam noh ya ka ILP wei lada ka sorkar ym leh ko yeini, ka UDP toh u mih noh ko na kani ka sorkar.
Discussion about this post