Shillong: Ka People’s Democratic Front (PDF), ka seng saiñ-pyrthai kawa kyrchaan ya ka sorkar Meghalaya Democratic Alliance (MDA) ha ka jylla Meghalaya, ha ka yalang yong ka ynne ka sngi da chim kawi ka sur wow pyrchah yei thmu pynman aiñ ya ka Citizenship Amendment Bill (CAB).
“Ha i lai cha Delhi ha ka 30 tarik u bnai wa dep, i da e dorkhat na i liang ka Party wa i pyrchah i ya ka CAB ha u montri ka kaam poh yung, u Amit Shah”, da ong u President ka PDF, u Banteidor Lyngdoh, uwa man leh u montri ha ka sorkar MDA. “I pyrshah i wow pynkrehkaam ya ka CAB ha ka jylla hi waroh kawi”, da ong u.
“Ka CAB toh ka phang yaklam wa ktah ya ki jaitbru ri-loom ha ka jylla Meghalaya wei i pynkrehkaam ya kani ka Bill wanrah ko yei syier ha uwi pa uwi wa chong chnong ri-loom ka jylla wa ha ka thaaiñ North East hi waroh kawi”, da ong. “Kam ka seiñ saiñ pyrthai kawa yieñ wow yada ya ka hok man tre kam ka jaitbru u yakhun pyrchah bait”, da ong u.
“Hajrong i ong wa ka CAB ym krehkaam ko ha ki Schedule Area, tangwa i sñiaw i wow ong wa ka CAB ym toh u krehkaam ko ha waroh kawi ka jylla khlem da jied ya kiwon kiwon ki bynta wa ki thaw”, da ong u Banteidor. “I klam ha ka yalang ka MDA wa kam ka Party i pyrchah wei kyntu i wow pyrchah bait ya ka CAB”, da ong u Banteidor.
Ha kawi won ka liang, ka PDF da pynsñiaw wei da kyntu ko yaka sorkar jylla wow pdiang ya i tyrwa yaklam suk ka Hynñiewtrep National Liberation Council (HNLC).
Discussion about this post