Shillong: Ka tamasa pynyoo rong ya ki baam kawa tip leh kam ka North East Food Show 2019 da kut ko ynne ka sngi da ka Chief Ministers’ Conclave ya kawa da pynlai da u montri rangbah ka jylla, u Conrad K Sangma heiwa da embynta u Biplab Kumar Deb, montri rangbah ka Tripura, u montri rangbah ka Arunachal Pradesh, u Pema Khandu, u BS Pant, u montri ka Tourism, Civil Aviation, Commerce & Industry, Sikkim wa kiwa chah khut sñiawbha kam u Kiren Rijiju, u montri khynnah ka sorkar pyrdi wa pait ya ka Youth Affairs & Sports wa u Rameshwar Teli, montri khynnah ka Ministry of Food Processing.
U Conrad K Sangma da ong u wa ka North East Food Show wa nyngkong dooh da chimbynta ki 250 kiwa pynyoo rong, ka yaphyllu yumut wa ki esikai. Da pynsñiaw u leh wa em boon ki Hotel kiwa pynsñiaw yei mynsien wa kwah ki u thied ya ki satrooiñ wa da chna kam i doh.
Da ong u leh wa i kiad Wine wa chna ha yung da ki soh man i iwa ku bha wei ka sorkar yaleh ko u wanrah ya ki aiñ heiyatoh wa i chna Wine khnang wa ki warep wa kiwa seiñ khih seiñ kreh u yoh myntoi ki.
Da pynbna u leh wa ya ka North East Food Show u pynman ya ka man u snem wei ha u snem wow wan won u man ko ha ka 26, 27 wa 28 Khonchonglad 2020.
U Kiren Rijiju da ong u wa i baam man i i bynta wa emkaam bha ha i rukom sdang chong chnong ki bru wei i baam ka thaaiñ mihsngi man i iwa tei wei iwa bha tam. Da ong u leh wa ka thaaiñ emkaam ko wow kyruiñ wow pynmih ya ki baam wa bha wa miat.
Neiliang won u Rameshwar Teli da ong u wa i rep i riang ka thaaiñ toh u sdang leh cha kiwi ki thaaiñ ka ri wei ka Ministry pynchlur ko wow rep ya ki jhoor ki soh khlem pynemkaam dawai. Da pyntip u leh wa ki wa daw booh ya ki Mega Food Park ha ki jylla ka thaaiñ lait na ka Meghalaya wa Sikkim tangwa da pynbna u wa ha Meghalaya leh daw em noh ko ya ka Mega Food Park.
Ha kani ka sngi da soi leh ya ki soskular MoU wei da pynlait leh ya ka kot North East Gastronomic Handbook wei da pynkupburom leh ya ki Trade Counsellor wa ki Ambassador.
Discussion about this post