Jowai: Ka Niamtre Committee ka chnong Panaliar, Jowai, ynnin da leh pynem warom ko yei dap le snem ka skur sikai niamtre wa em hapoh ka chnong, heiwa u Waheh Wanbi Laloo daman u kam u Kongsan katwa u Pator, u Waheh Raymond Nartiang daman u kam u symbood kongsan. Yaka yalang tbian da pyllai da u Chairman ka Niamtre Committee, u Waheh Kyllimot Lhuid deiwa sdang nyngkong da i ngoohblai na ka Chirata Bamon.
Hei klam yong u Waheh Chnong ka chnong Panaliar, u Waheh Riquoma Rq. Laloo, da yaroh u ya ka Committee yeiwa daye ko u pyllai bait lai ryntih ya ki kaam na kipor cha kipor weiwa daye ko u sdang ya kani ka skur ka wow man ka luti ya ka mynried yong kini ki khynnah wa dachah sikai; da e bor e mynsien u ya ka Committee yow nanglai chooh chooh ko chakhmat ha ki kaam wabha ki yong ka deiwa khut haroh u ya waroh ki khon ka chnong yow yakrehlang ha waroh ki kaam ka chnong.
U Raymond Nartiang, Pator Jowai da e u ya ka parom tbian yeiwa ka chnong Panaliar em ko, heiwa daseiñ ya ka chnong da kawi na ki soongut chipayu ki Puri Blai, ka Weipun Wet. Da ong u, wa ka chnong Panaliar nadooh nachwa daman hi ko kawa emnaam ha kiwa boon ki kaam. Kyntu u ya ki bei ki pa yong ki khynnah yow phah ki ya ki khon yong ki cha ka skur yow chah sikai ki, kamwa oo leh dasdang u yow tip ya ka niam nei sdang u Puramon Kynjing ya ka skur sikai Niamtre, uwa man katni u Dolloi ka Elaka Jowai.
Hei klam u kongsan, u Waheh Wanbi Laloo, da ong u, watoh u makhane bha wei u burom bha ya kiwa sikai, neibhah ladam em ki, kini waroh ymman ki kamni, lyngba kini ki khynnah wa dachah sikai ye u pynheh yeitip niam wa pura hadooh ki waheh. Dakhut u ya ki khon ka chnong yow wan tista ki cha katai ka skur sikai niamtre heijooh ipor cha ka niamtre kawa pynman da ka Committee man ka sngi Bibar. U kongsan ong u, wa emkaam u e sikai wabniah weiwa janai bha ya ki khynnah, kiwa dangman ki lok ki Blai ki wow man ka mynried ka yong nga ka yongphi.
Ya ki kyntien e khublei da e da u Barlee Moore Shilla, Secretary Niamtre Committee hadien neitæ da pynbood da ki chaad ki yalehke na ki khynnah skur yong katai ka skur.
Ha kani ka yalang dawan sakhi da u Pa Daloi ka Jowai Elaka chiruplang u Carehome Pakynteiñ, u EMH Passah wa kiwi kiwa kreh niam ka Dorbar Niam.
Discussion about this post