Ka Union Cabinet, wa khlieh da u Prime Minister Narendra Modi, da mynjur ko yow leh yaka Census ka ri India ha u 2021 hei lut wa T. 8,754.23 klur wei wow pynthymme ya ki pyrtuid ki bru wa em hapoh ka ri hapoh ka National Population Register (NPR) hei lut wa T. 3,941.35 klur.
Ka Census ka ri India u leh yaka ha waroh kawi kamjooh yaka NPR ka wow leh yaka ha waroh ka ri lait noh hapoh ka jylla Assam.
Ka Census kawa leh chisien 10 snem da toh wow leh biang yaka ha u snem 2021 wei u leh yaka haki ar bynta (Two Phases). I kheiñ yei em ki yung (House Listing & Housing Census) April-September, 2020 katwa ya i boon bru u leh February 9 hadooh 28, 2021. Yaka National Population Register (NPR) leh daw kyntu heipor wa leh yaka House Listing & housing Census lait noh ha Assam.
Ha ini waroh daw pynemkaam hadooh 30 lak ngut ki bru wow psiah cha iwi pa iwi i yung iwa ku naka 28 lak ngut wa pynemkaam ha u snem 2011. Daw pynemkaam leh da ki Mobile App yow pyllang yaka yukheiñ hei pait ka sorkar pyrdi.
Neiliang ka sorkar da ong ko wa ka National Population Register (NPR) ym em yatoh namo pynyabi ka waka National Register of Citizens (NRC) heiwon iwon i rukom. U Union Home Minister Amit Shah da ong u wa ka NPR toh du wow yoh yukheiñ katwa yaka NRC won toh kawa phah ya ki bru wow pynsakhiat da ki kot ki sla yei man tre ri.
U Information & Broadcasting Minister Prakash Javedkar da ong u wa hawa leh yaka NPR ym paan ya ki kot ki sla namo u chim iwon iwon ki dak ki chin na ki bru deiwa chim ya i dur pariam kti wa kiwi kiwa tip kam ki Biometric Information wei u pdiang ya iwa ong ki paidbah.
Ki heh sorkar da ong ki leh wa kiwa em pyrtuid hapoh ka NPR ym em mut toh ki tre ri wei wow tip donhi kiyi de wa em hapoh ka ri kiwa tip kam ki “Usual Residents” kiwa da chong da sah ha iwi i thaw la 6 bnai wei daw pteiñ ki u sah 6 bnai næ palat 6 bnai.
Ka National Population Register toh kawa sdang ha u snem 2010 hadien wa ka sorkar u Modi da wan ko hei bor heiwa yaki Biometric da chim lyngba u Aadhaar wei da thap ya ki hapoh ka NRC.
Kiwa pyrchah yaka NPR da ong ki wa ini toh i sdang yow pynkrehkaam yaka NRC hapoh ka ri heiwa ka Chief Minister ka West Bengal wa Kerala da ong ki wa ym pynkrehkaam yaka NPR. Hanlada ki jylla ym em bor ki wow khang ya ini tangwa ki bru wa pynemkaam toh kiwa napoh ki jylla.
Discussion about this post