Neiliang ka Confederation of Meghalaya Social Organisation (CoMSO) da pynsñiaw ko yei wym yahaap yei klam u Vicent H. Pala (MP) wa ka jylla haap jied ko du kawi, lada ka ILP namo ka Sixth Schedule wei lada krehkaam ka ILP ka Sixth Schedule leh u dooh noh ko.
Ka CoMSO da ong ko wa ini toh iwa yah bakla ya ki paidbah ka jylla wei i klam kulmaar uni u MP, da pynrap ko leh wa i kaamram yong oo kam u MP toh wow yasaaid neibynta ka jylla khamtam wow yada yei man kyrpang ka jaitbru.
“Lada u Vincent Pala pyrchah u ya ka ILP toh u klam che u wa pyrchah u ya ka ILP wei ymtoh u klam thlandaman u,” da ong u Chairman ka CoMSO, u Robertjune Kharjahrin.
Ka Sixth Schedule ka riti synchaar ka India toh ka stieh kawa yada ya ka riti dustur, ka khyndaw ka chyiap, ka khayi pateiñ, ki dorbar tre ri wa ka hok kyrpang yong i ki tre jylla wei ki District Council wanrah ki leh ya i roi i paar wei emkaam u pynkhlan chooh ya ki (District Council) da ong ka CoMSO deiwa pynrap leh wa toh i kaamram u MP wow pyntikna wa ka Sixth Schedule u khlan chooh ko.
Ka ILP kawa mih na ka Bengal Eastern Frontier Regulation 1873 toh ka aiñ wow kdoh nei wan psiah ki baar jylla ha ki thaw wa krehkaam ka ILP neibhah ka thong yong ka ILP toh u yada ya ki tre jylla kiwa khian paaid.
Ka CoMSO da ong ko leh wa hawa kyruiñ cha ka jylla Meghalaya wei i man i long katni, da sñiaw yei emkaam lang pyn ar, ki District Council kamjooh wa ka ILP namo ka stieh wa ka waitlam yada ri.
Da pynkynmoo ko leh ya u Vincent Pala wa ha Mizoram em 3 tylli ki District Council, ka ILP leh krehkaam ko hajrong i em ka Article 371(g) , ha Nagaland em ka Article 371(a) wa ka ILP, ha Arunachal Pradesh em ka 371(h) wa ka ILP wei ha Manipur ka Article 371(c) krehkaam ko wei katni sa ka ILP katwa kamtæ ymye u ong lada krehkaam ka ILP, ki District Council u dooh noh ki neibhah kamwa man kiwi ki jylla, ka Meghalaya leh emkaam lang ko ya ka ILP wa ka Sixth Schedule namo wa Article 371.
Discussion about this post