Jowai : Ka KSU Mawryngkhneng Circle da leh warom ko yaka World Environment Day haka 4 tarik u Naiynru deiwa pynman ya ka Awareness programme ha Orchid Seven Hut Hotel kawa em hapoh ka chnong Mawryngkneng.
Ha katai ka programme dawan yachim bynta da kiwa chong chnong nadooh ki manbei manpa wa ki khynnah khynroo kyllood ka chnong.
I thmu wa kongsan yong katai ka programme toh yow pynsñiawthooh cha ki paidbah hajrong i kordor ka bei rymaw kamjooh yow pynneh pynsah ya ka.
Yaka yalang da pyllai da u General Secretary ka seiñ u Shiningstar Kharbihkhiew wei yei klam maitphang da e da u President ka seiñ u Reallystar Nongspung heiwa da ong u waka rymaw toh wada e kyrpang u Blai ha u bru wei toh i kaamram u bru u sumaar sukher yaka.
Da ong u leh “ka um toh kawa emkaam tam ya u bru yow im u kamtæ hap sumaar bha i yaka kamjooh ya waroh kiwa im haka.”
Da yoh leh yei klam na u Sordar ka chnong Mawryngkneng u Peter J. Lawai uwa ong kam ka chnong embynta wei em i kitkhlieh kawa khroo yow thaw yaki laad kamjooh ki aiñ yow ye u pyrchah yei chah leh beiñ ka rymaw kam hei pomdieñ hadooh wa da syllen ki loom wei kamjooh leh i tynyap ya ki mrad.
U General Secretary ka chnong Mawryngkneng u Wanlambok Kharsati ong u wa kiwi ki Ri chna ki yaki aiñ yow pyrchah yei chah pynjæt tynpra ka rymaw katwa ha Meghalaya won ki paidbah haap ki u yaleh pyrchah ya ka Sorkar nei bynta ka Mariang. Da e nongmuna u kam i thmu ka Sorkar Bei lyngba ka Sorkar Jylla yow tih ya u Uranium cha thaiñ West wa South West Khasi Hills.
Ka bynta wa ar yong katai ka prokram da tip kam ka “SAVE FISH SAVE RIVER CAMPAIGN” wei ha katai ka sngi ka seiñ da pyllait ko kamwa 3000 tylli ki symbe dahkha ha ka Wah Lwang wa ka Wahbah wa em hapoh ka chnong Mawryngkneng kam chibynta wow hikai yaki paidbah kamon u pynneh pynsah ya ki Dakha wa kiwi kiwi yow man ki, ki wah wa im wa khooid wa suba kiwa ye u kyrchaan yei emkaam ki bru.
Discussion about this post