Jowai: Haka Rong Khoo (Rice Festival) kawa pynman ynnin ka 25 tarik ha chnong Mukhap da mih ka sur wa i ya mynjur wa yaka mynried ka mankawi chong ko ha ki symbe tynre.
Ya kani ka Rice Festival da kyrchaan da ka Society for Urban and Rural Empowerment (SURE) wa ka North East Slowfood and Agrobiodiversity Soceity (NESFAS), Shillong kiwa da wanrah ya ki symbe khloo ki warep ha kani ka thaaiñ kiwa dang ya pynemkaam hadooh kini ki sngi. Ha kani ka sngi ki kynhun kiwa wan leh wow chimbynta ha wow dai ya ki baam kamjooh ki dih tynre khamtam kitu kiwa chna na u khoo.
Haka yalang kawa wan wai da u Garod LSN Dykes uwa man u DC yong ka West Jaiñtia Hills, da kyruiñ dien u cha i man khynnah khynroo u wa jooh rep u ha i por chuti wei da pdiang u yeiwa ong kiwi won kiwa klam wa katwa dang mih ki sngi, ki symbe kba tynre da nang dooh jait heiwa ki bru ym rep de yaki.
Ka Rica Lamare kawa kreh kam ka Assistant Development Officer hapoh ka Laskeiñ da ong ko wa boonsien ki heh sorkar haka chnat krehkaam yong ka jooh phah wow thooh biang ya ki symbe tynre kiwa ki bru jooh pynemkaam ki tangwa iwa sñiawsih toh wa ym jooh yoh katkam wa mut.
Ka Hamsñiawpher Suchiang kawa man kawa yahkhmat yong ka kynhun kawa sdang yaka thaw kynchew symbe tynre (Seed Bank) haka chnong Mulum, da pynsñiaw ko yei sñiawkmen wa nadooh wa da sdang biang wow kynchew symbe, da ye ki wow lum chiboon ki symbe tynre kiwa kynthup leh ya ki symbe khoo wa kyrpang.
U Thij Langstang u warep wa pawkhmat yong kani ka thaaiñ leh da ong u wa ki symbe kba da jan dooh jait ki katwa dang lai ki sngi, wei da ong u leh wa ki symbe kiwa jooh rep heipor wa dang khynnah u ym em de ki.
Ka Pasqualina Lamare kawa man kam ka Program Coordinator yong ka SURE da ong ko wa du ha Jaiñtia Hills jooh em palat chispah jait ki symbe khoo, tangwa katni da jan dooh jait ki, kamjooh leh u Pius Rani uwa man u Senior Associate ka NESFAS uwa ong wa ha ki por wa em u ha Philippines da chem wa ki bru heitai em ki palat 6000 jait ki jait kba wei da ong u wa kamwa man ya u kba, da jia leh ya u kre uwa ki bru yong i jooh rep bha ki, tangwa katni da jan dooh jait.
Ki kynhun kiwa da chimbynta toh ka Kyntulang SHG, ka Iakrehlang SHG, ka Lamlynti SHG, ka Pynroilang SHG, ka Seiñdur SHG, ka kong Aiom Ksiar wa ka Kyntulang SHG kiwa wanrah leh ya ki baam kiwa chna na ki soh ki pe. Ka Mukhap Handloom won da wanrah pynyoo ya ki that kiwa ki thaiñ hi ki.
Da em leh ka e kylliang symbe para ki warep (Seed Exchange Program).
Discussion about this post