U Piwel Shylla uwa na ka chnong Moolang, East Jaintia Hills District uwa man leh uwi na ki kyrtong MDC 2019 na 22-Musniang Rangad MDC Constituency, da psiah u cha ka Congress Party ynne ka 3 tarik ha yungkrehkaam yong ka Party Congress Bhavan, Shillong.
Ha kani ka sngi pdiang ya u Piwel Shylla cha ka Party, da pynlai ya ka yalang da u President ka Khliehriat Block Congress Committee u Deibormi Syad. Wei da yoh leh yei klam tbian na u President ka East Jaiñtia Hills District Congress Committee wa u MLA ka 5 Sutnga-Saipung Constituency, u Shitlang Pale, da emlang leh ka Ampareen Lyngdoh (MLA), u Working President ka MPCC u James Lyngdoh wa u General Secretary ka MPCC u W. Kyndiah.
Ha kani ka sngi u Piwel Shylla da ong u wa i psiah yong oo cha ka Party Congress toh neidwa wa yoo u ya ki nongmuna wa bha yong u Mahatma Gandhi ha ki kaam wa chakri u ya ki paidbah. Da ong u leh wa kani ka sorkar wa katni man ko kawa tlot wei ka wym ye u synchaar bha ha waroh ki liang. Heiyatoh wa u mooyong, da ong u wa kani ka sorkar da thok ko ya ki paidbah deiwa kular ha i por Election wow pynlait ya u mooyong hapoh 3 bnai lada wan ha i bor, tangwa hadooh katni kani ka sorkar ym chna ko yaka Mining Policy khnang wow yoh u wai biang ya i khih mooyong.
Da pynbaad u leh wa tlot ka JHADC ha ka kaam poisa tyngka hapoh i yahkhmat yong ka NPP wei hadooh katnni katni ym pu em i pyrkhat namo ki luti wa biang yow pynku yaka Council wa ya ki paidbah yong i. Da khut da wer lang u ya ki paidbah wow psiah cha ka seiñ Congress neibhah du hapoh i synchaar yong ka Congress, ka ri u man ko kawa chongsuk chongsaiñ wei kawa tip ya kiwa kup chilliang sem chilliang. Da kyrmen u wa ha u snem 2023, ka Congress daw wan biang ko ha i bor, wei da kyrmen u leh u jop lut ko ha waroh ki Constituency ha Jaiñtia Hills.
Discussion about this post