Ka Airport wa nyngkong dooh ka jylla Sikkim kawa wan wai da u montri rangbahdooh ka ri u Narendra Modi haka 24-09-2018 kawa tip kam ka Pakyong Greenfield Airport kawa em kamwa 31 Km na nongbah Sikkim da ye u wai biang ka ha u Wisu (March) 2020 hadien wa khang yaka nadooh u Naiynru (June) 2019.
Ka Spice Jet kawa man du ka donhi wa hær cha kani ka Airport na Kolkata International Airport hapoh ka UDAN Scheme da pyndam chwa ko wow pynlai yaki lieñsuiñ yong ka hadien wa chemchitom wow hiar ha kani ka Airport neidaw wa chitom ki Pilot wow chynna wei em ko leh kamwa 5,000 Feet katkam wa kheiñ na sla duriaw wei boon ki por i suiñ bneiñ man i wym biang wei ym em leh ki tiar ki tar ha kani ka Airport wow yah luti ya ki Pilot wow hiar ki.
Neiliang ka Airport Authority of India (AAI) da pyntip ko wa da dep ko wow pynbiang ya ki tiar ki tar kam ki Navigation Equipment, Metrological Instrument wa ki Visibility Markers ha kani ka Airport.
Ka AAI da thoh ko leh cha ka Spice Jet chaphang ini yow pyntip ko mynnu sdang biang u hær ki lieñsuiñ yong ka.
Kani ka Airport toh kawa ong kiwa boon kawa man kawi na kiwa miat dooh hapoh ka ri.
Da mang poisa leh T. 50 Klur yow pynlut kam ka bai su cha ki tre thaw wa ki manyung wa chah ktah nei chna ya kani ka Airport.
Discussion about this post