Jowai: Kam chibynta wow yarap yaka thaaiñ Bataw ha ka lai ka wan khamtam ha i kjut i chitom, uwi u khynroo na Ladrymbai Dongwah, u Marshall Biam haka 15 tarik uni u bnai da lai e sñiawbha u da kawi ka kari kit bru wa kjut (Ambulance) neibynta katai ka thaaiñ.
Hawa klam ha katai ka sngi, neiliang yong oo, da ong u wa katkam i lai luti yong oo kam u khynroo wa em ya i mynsiem ya krehlang neibynta ka jaitbru lane ha ka imlang sahlang, hawa yoo u ya i eh yong katai ka thaaiñ klem yohsa da e u ya kani ka kari Ambulance neidaw wa ong u wa lada ki bru em kari ki leh tangwa yow lai ym ye ki kam ka kari kit wa kjut kawa ye u lai bait khlem chah khang luti wei na ini i daw da e u da kani ka kari neibynta katai ka thaaiñ wei kamjooh leh kiwon kiwon kiwa emkaam, ye ki wow pynemkaam neibynta i kjut i chitom ong u M. Biam.
Ha kani ka sngi wai ya kani ka kari da emlang leh u Finely Bareh, MDC Lad Rymbai Khliehriat, ha i emlang u waheh chong yong ka chnong Lad rymbai Dongwah deilang wa ki waheh chnong, Secretary Chnong waphær waphær yong ka thaaiñ Bataw Lakadong, kiwa da e yaroh ya u M. Biam uwa em sakhiat ka mynsien maya jaitbru.
Ha katai ka sngi ya ka yalang da pynlai da u Hillson Amrasong, wei da yoh ya i duwai pynkyntang da u Tbn. Hunmon Rymbai. Ha kani ka sngi da emlang leh ka bei u M. Biam kiwa ha yung ha sem yong oo wa ki paidbah yong ka thaaiñ Bataw Lakadong wei kamjooh leh yong ka Dong Lad Ladrymbai Dongwah.
Neiliang u M. Biam da ong u wa ya kani ka kari kit wa kjut kiwon kiwon ki bru yong ka thaaiñ Bataw Lakadong kamjooh yong ka thaaiñ Lad Rymbai ye ki wow Phone ha u Number wa da booh ha kani ka kari.
Discussion about this post