Ki khloor yalehke Kickboxing ka Ri-loom Jaiñtia da wanrah naam ki ya ka ri ha ka lympung yalehke Kickboxing ya kawa da tip leh kam ka Indian Open International Kickboxing Tournament 2020.
Kani ka lympung toh kawa da pynman ha Talkotara Indoor Stadium ka nongbah New Delhi nadooh 9 hadooh 13 tarik uni u bnai.
Ha kani ka lympung da wan chimbynta da ki 688 ngut na ki 33 Club wa wan na ki san tyllli ki ri, kiwa kynthup ya ka India, Kazakhstan, Jordan, Iran wa Ukraine.
U khloor yalehke Kicboxing na Shangpung, West Jaiñtia Hills u Hameshaniah Suiam da yoh u 3 tylli ki takma ksiar ya ka India kini toh ha ka kyrdan Point Fighting 57 kg Senior Men, Point Fighting 63 kg Senior Men wa ka Grand Champion Open Weight Category Point Fighting Men.
Kiwi won kiwa da yoh takma toh u Pynshrainmiki Rabon uwa da yoh takma ksiar ha ka Low Kick Senior Men 67 kg wa u Heimonmi Suchiang uwa da yoh takma rupa ha ka Full Contact Junior Boys -54 kg.
Kani ka lympung toh kawa nyngkong dooh hapoh ka ri wei da yooluti leh wa daw ye u pynman chooh ya ka ha ki snem wow wan khnang wow ku kyrdan ko ha ka World Association of Kickboxing Organizations (WAKO) cha ka Class B, Class A wot hadooh ka World Cup.
Discussion about this post