Ka Chaad Rongkusi hapoh ka chnong Nongbarehrim, West Jaiñtia Hills District, da pynman ya ka ynne ka 24 tarik heiwa u montri ka sorkar jylla uwa man leh u MLA ka thaaiñ, u Lahkmen Rymbui da man u kam u kongsan.
Ha kani ka sngi da em ka yalang wa tbian heiwa neiliang ka chnong da ekti ko ya ka dorkhat (Memorandum) ha u Lahkmen wow pynkynmoo ya i emkaam ka chnong wa kynthup ya ka madan yalehke Football, ki sarok wa ka Community Hall wei ya kani ka dorkhat da ekti da u waheh chnong, u Will Pohtam.
U Lahkmen hawa e yei klam da ong u wa emkaam u man ka chnong kawa yatylli khnang wow ye u wanrah ya i bha i miat khamtam ki kaam pynroi.
Da khana u leh ya ki Scheme sorkar waphær waphær wa da wanrah ha ka thaaiñ nadooh ki Scheme saam um, ki sarok wa kiwi kiwi.
Hajrong ka dorkhat wa da ekti ka chnong, u Lahkmen da kular u wow chimkhia wow booddien ya ki wei da pynrap u leh wa ym du ini wa emkaam tangwa i emkaam mih ki kat dang lai ki por ki snem.
Kani ka chaad Rongkusi toh ka lehkmen wa da chimbynta da waroh ki chynrang wa kynthai (ki khynnah, khynroo wa ki waheh) heiwa da chaad ha ki sur wa kieh na ka ksiñ wa ka bhuri.
Neidaw wa ym em kawon kawon ka lehniam da ye u chimbynta da kiwon kiwon ki khon ka chnong ha kani ka chaad. Kiwa kynthup ya kiwa ngait ya ka niam Chnong (Niamtre) wa ki Skur (Christian).
Ya ka Rongkusi da jooh pynman chisien chi snem kam ka dak i lehkmen, wow yoh yei bha i miat wa i chongsuk hapoh ka chnong.
Discussion about this post