Jowai : Ki le seiñ wa kynthup ya ka North East Indigenous People’s Federation (NEIPF), Hynniewtrep A’chik National Movement (HANM) East Jaiñtia Hills waka Hynniewtrep National Youth Federation (HNYF) da jubab ki yei ujor (FIR) u ma Ambrose Pala, Inspector of Mines Royalty heiwa da kynnoh u wa ki heh kini ki seiñ da dawa poisa ki na oo T. 30,000.
Kini ki le seiñ ong ki wa ini i kam u Ambrose toh iwa ym em nongrim wei ym ye u leh u pynsakhiat wa kini ki le seiñ dawa poisa ki na oo. Ini toh du i pyrchang yong oo u daisarom yei pyrtuid ki seiñ wei i pyrchang yong oo u sait khooid na ki kaam be-aiñ iwa leh u ha ka check-gate kawa ki seiñ da dep booh FIR ki pyrchah yei wa leh u ha ka 2 tarik Naiynru.
Ki le seiñ leh da kynnoh ki wa u Ambrose toh uwa tyngkheiñ ya ki aiñ deiwa khrong poisa u na ki truck wa kit palat pood bar yei wa chah ka aiñ heijooh i por leh ym jooh ksoh u ya ki katkam i kaamran wada bynta ha oo.
Da kynnoh kini ki le seiñ leh wa u Ambrose pynchlur u ya kiwa yah truck yow kit ki palat wa chah ka aiñ yow su poisa ki ya oo.
Kamtæ kini ki le seiñ ong ki wa da yachem ki wa oo wei da maham ya oo yow dam noh u yeini i kaam be-aiñ wa leh u tangwa pteiñ bait u yeini.
Kini ki le seiñ hadien ini da booh ki da ka FIR ha ki police. Katkam i ong kini ki heh ki le seiñ da ong ki wa u Ambrose tyrwa u ya ki T. 2,00,000 yow pyndam noh ya ka FIR yong ki tangwa neiliang yong ki seiñ da kyntait ki yei tyrwa yong oo kamtæ oo da ujor FIR u pyrchah ya kini ki le seiñ.
Discussion about this post