Ynne ka sngi da booh ya u mooyurim wow chna ya u sarok chnong (Internal Road) ha Mukhap uwa jrong kamwa 3 km hei lut iwa T. 2.80 klur hapoh yong ka RIDF-XXIV.
Ha kani ka sngi booh mooyurim da wan ka RV Suchiang, Addl. Chief Secretary ka jylla kam ka kongsan, katwa u PR Marwein, Secretary ka PWD(R&B) won da man u kam u symbood kongsan hei emlang u MLA ka thaaiñ, u Nujorki Sungoh.
Hachwa wow sdang ka yalang da yoh ya ki kyntien pdiang burom na u R. Lytan, Superintending Engineer, PWD Jowai Circle wa i klam na u Niawbait Ymbon, uwa man u Waheh Chnong ka Mukhap.
U Nujorki hawa e yei klam da ong u wa kam uwa mihkhmat kwah u wow wanrah ya ki kaam pynroi hapoh ka Constituency deiwa pynrap wa khlem i yakrehlang wa ki sahep sorkar ymye u wanrah ya ki kaam pynroi.
Da ong u wa ka Constituency man ko kawa embhah tam neibhah du hapoh ki 2 snem da yoh hadooh 15 tylli ki sarok ha kylleiñ ki chnong ka Constituency.
U PR Marwein da ong u wa hawa ka chnat kreh ko ya ki sarok kwah ki wow chna ya u sarok wa miat deiwa kyntu ya ki sahep ka chnat wow pyntikna ki wa hawa kreh ya uni u sarok u kreh ki dei miat khnang wow neh khnang wow myntoi ki paidbah.
Neiliang ka RV Suchiang kam ka kongsan da ong ko wa khlem u sarok man i iwa eh wow wanrah ya i roi i paar wei ki sarok ha jylla man ki kiwa dang duna bha.
Da khana ko wa ka thong yong ka sorkar toh wow wanrah ya ka roi i paar.
Ya kani ka yalang da pynkut da ki kyntien khublei na u Teibor Papang uwa man u Secretary ka chnong wei da pynphooh ya ka yalang da i chaad na ka Seiñraij Mukhap.
Discussion about this post