Ka Jaiñtia Youth Development Society da lai e yarap ko yaka manyung ka Sumar Bareh ha chnong wa sah ko ha Jalaphet, East Jaiñtia Hills da ki tin sap yung wei wow pynchna leh yaka yung yong ka.
Ha kani ka sngi da em ka yalang wa tbian wa pynlai da u Vice President ka Society wei da emlang leh u MDC ka JHADC yong ka Myngsngat Khanduli u Dawan Lyngdoh uwa da e yei klam maitphang hajrong ka yurim wa i angnood yong ka Society wow kreh neibynta i bha haka imlang sahlang wei da yoh leh yei klam na u Pyndap Shadap uwa man leh u Chairman yong ka Society uwa da pynsñiaw yei kmen wa ka Society katwa dang mih ki sngi da ye ki wow e yarap ya kiwa emkaam hanlada man i leh i yarap wa khian.
Da yoh leh yei klam na u Jimmy Raul Kharmuti uwa da e yaroh ya kani ka Society ya i lai luti ko wow e yarap neibynta ki khonswet khonrangli wei da e u leh ya ki ktien kyrkhu kyrdoh yaka Society. Da yoh leh ya i klam na u waheh chnong yong kani ka chnong u W. Chyrmang uwa da pynsñiaw yei sñiawngooh wei sñiawkmen wow yoo ya kiwa yahkhmat yong ka Society wa pynyoo ki da ki kaam lyngba i e yarap ya kani ka manyung wei da e u leh ya ki ktien pynchlur chooh chooh ya kiwa yahkhmat ka Society wow nang lai ki chakhmat.
U Damanleki lathong uwa man leh u President yong ka Society hawa e yei klam da pynsñiaw u yei sñiawngooh yaki para dkhot wa da chimkhia ki neibynta wow yarap ya kani ka manyung kawa man kam i angnood ka Society.
Discussion about this post