Shillong: U Montri Rangbah, u Conrad K Sangma da ong u wa i long i man ha ka nongbah Shillong wa kamjooh ha ka East Khasi Hills waroh kawi da ye wow pyn jai jai hadooh katni, tangwa da pynrap u wa ka sorkar dang chim ko ya ki laad yada yow lait na kiwon kiwon ki jia wa ktah ya ka suk ka saiñ.
Hawa klam ynne ka sngi, u Conrad da ong u wa ka sorkar ka dang yaklam ko leh wa ki seiñ waphær waphær yow kyntu ya ki wow ya krehlang hei wow wanrah biang yei chngaiñ wa ka suk ka saiñ ha ka jylla.
Da pyntip u wa neiliang ka sorkar jylla da yaklam leh wa ka sorkar pyrdi wow paan yarap bor chooh chooh wei ynne ka sngi da yooluti wa daw wan poi biang sa 2 Company ki bor pulit ki wow pait neibynta ka suk ka saiñ ha nongbah Shillong wa cha ki thaw wa haap hapoh ka Sohra Civil Sub Division.
Hawa kylli hajrong i pteiñ yei pynkrehkaam ya ka Curfew ha nongbah Shillong, u Montri Rangbah da ong u wa i pynkrehkaam yaka Curfew toh yow khanglaad ya iwon iwon i jia iwa ye u ktah ya ka suk ka saiñ. Da pyntip u wa i e Curfew khlem sangeh ha ka thaaiñ Khyndailad, Motphran, Iewduh wa ki thaw wa haap hapoh ki ar tylli ki Police Station, ka Sadar wa Lumdiengjri PS toh neidaw wa kitai ki thaw toh kiwa boon dooh ki paidbah khleh jaitbru.
Katkam i ong u Conrad, ka sorkar daw bichaar ko yei pynyinsur næ pyndam noh ya ka Curfew hadien yoo yei long i man khamtam ka chongsuk chongsaiñ ha ki kynta wow wan.
Discussion about this post