Shillong: Hadien soo sngi wa da pynkrehkaam ya ka Curfew ha ki bynta yong ka East Khasi Hills, khamtam ha ka thaaiñ Khyndailad wa Motphran kiwa da lyngam kiaw ha kini ki sngi wa da dep hadien i kynad wa da mih ha Ichamati wei kawa da sdang u poor leh cha nongbah Shillong, ynne ka sngi kawa san, neiliang ki bor pynlai District da pyllait ki da 3 kynta ya ka Curfew ha ka thaaiñ Khyndailad wa kiwi kiwa chajan.
Hawa yoh wow lai pait ha ki kynta wa da pyllait ya ka Curfew, da yoo wa ki paidbah ym pu em chlur ki wow mih wei ye u man wa ym sñiaw myntoi ki wow mih neibhah wa duna palat i por pyllait, neibhah da sakhi cha kiwa boon hi ki dukan man ki kiwa khang khyrdep lut wa kiwa lai wa wan leh duna bha, tangwa em hi ki bru kiwa jooh myllien wow dai baam madan ha ka thaaiñ Khyndailad da mih ki wow wai dukan wei da em kattu katni donhi ki kari kamai.
Chooh chooh da sakhi leh wa em du kattu katni ngut kiwa da mih ha katai ka por wa kiwa chong paitke ha sarok, katwa ha ka thaaiñ Motphran kawa ym pu em pyllait ya ka Curfew da yoo wa kiwa dai jhoor kiwa da siang madan wow sai ya ki mar dai ha Mawkhar, YMCA wa ha ki kattu katni ki thaw markhap.
Katkam ka khubor wa da yoh ynne ka sngi, ym em iwon iwon i jia kawa da ye u wanrah ya ka chong syier, tangwa yow khanglaad na iwon iwon i jia kiwa ye u ktah ya ka suk ka saiñ, neiliang ka yung krehkaam ka Deputy Commissioner, ynne i miet leh da pynkrehkaam biang ya ka Curfew nadooh i por 9 waje hadooh i por 6 waje i step ka 4 tarik ha waroh kawi ka sor Shillong.
Discussion about this post