Mawkyrwat: Ka Langrin Constituency ynne ka sngi da yoh ko ya u MDC wa thymme da u Pius Marwein na ka United Democratic Party (UDP) uwa man leh ha i jooh i por u MLA ka Ranikor Constituency.
U Pius da jop suk u ya kani ka Election deiwa tam ya u kyrtong wa wan wa ar na ka seiñ Congress, u Jotin Khardewsaw hadooh 6979 Vote, ha kani ka niaw Vote, u Pius da yoh u 13793 Vote, u Jotin da yoh u 6814, katwa u kyrtong ka NPP, u Kitborlang Nongrem da yoh u 3212 Vote wei u NOTA da yoh u 244 Vote.
Hawa klam hadien i jop, u MDC wa thymme da e khublei u cha kiwa kyrchaan waroh kiwa da kreh chitom wow pynyoh yei jop ha kani ka Election. Da ong u wa kam u khynroo uwa kiwa chong chnong ka thaaiñ da e ki ya i chaniah wow mihkhmat cha KHADC daw e u ya i chakri kawa bha tam neibynta yong ka thaaiñ.
U Pius da kyntait u wow klam iyi iyi hajrong i long i man wa ka kynrum kynram ha KHADC, tangwa daw pait u ya iyi wa ka Party thmu ko wei daw hap chim rai ya iyi wa ka Party mynjur ko neibynta i bha i miat waroh lang. Da ong u wa ini i jop man ko i kyrkhu kawa khroo yaka seiñ hi waroh kawi khamtam wow ya phyllu yumut hajrong i wym lai bait lai ryntih ka District Council.
Chooh chooh da ong leh wa nadooh wa sdang ha kani ka yaleh kawa da em i kyrmen lypa wow jop suk.
Ya ka Election MDC chiteiñ samoi da hap wow pynman noh hadien i khlaad u MDC warim ha u snem wa da dep u Nasar Marwein.
Discussion about this post