Shillong: Ki seiñbhalang wa kynthup ya ka Khasi Students’ Union (KSU) wa ka Federation of Khasi Jaintia and Garo People (FKJGP) da pynsñiaw ki yei sñiawphylla hajrong i rukom takit yei jia ha ka chnong Ichamati kawa da wanrah yei mynsoo ya kiwa boon wei da khlaad noh u Lurshai Hynniewta.
Kiwa yahkhmat yong kini ki seiñbhalang ynne ka sngi da lai pait ki ya u sordar ka Umwai, u Tyngshain Wanwar ha Shillong Civil Hospital uwa da mynsoo na i chah thombor ha ka 28 tarik u bnai wa da dep.
Hawa yaklam wa ki laad patahi khubor, u President ka KSU, u Lambokstarwell Marngar da pynsñiaw u yei lyngngoh ya i rukom takit ki pulit wa i thung ka sorkar ya ka Magisterial Enquiry hajrong itai i jia. Da ong u wa ka sorkar da kam ko wa da kem ya 8 ngut ki bru kiwa emkti wow thombor ha Ichamati, tangwa hadooh katni ym tip cheiwon booh ya kini ki bru.
Da ong wa katkam i pyntip u sordar, da em kamwa 90 ngut ki baar jylla wa da yoh pyrtuid kiwa emkti wow hiar thma ha Ichamati, tangwa ka kynhun takit wa da thung da ka sorkar næ ki pulit ym pu em wan ki wow kylli na u sordar hajrong itai i jia wei ini da pynartatien sakhiat ya ini i rukom takit.
Neiliang u President ka FKJGP, u Wellbirth Rani da ong u, hei yong sakhiat kiwa takit toh u lai yachem chwa ki ya kitu kiwa da mynsoo neibhah ki toh kiwa sakhi yei jia, tangwa hadooh katni ym pu em kawon kawon ka takit ya ki. Da ong wa ka sorkar toh u kem chwa ya ki bru kiwa emkti wow pynkulmar wei hadien daw em i jai jai ha ka jylla, wei katni ka sorkar ym ye ko wow ong wa da ye u pynjai jai.
U Rani da ban joor u wa lada ka sorkar kwah ko wow pynjai jai, toh u pynyoh ko yaka Inner Line Permit (ILP) ha kani ka jylla neibhah ini i jia waroh mih i na i dawa ya ka ILP. Da ong u wa kitu ki bru wa emkti wow thombor ha Ichamati ym ye wow ong wa toh du ki khar Bangla neibhah em ki ya ki EPIC wei em kiwa chong wa sah ha Shillong leh, wei ya ini toh u chimkhia.
Discussion about this post